Otmar Oduber si bo no por caba cu e 1% cu falta di proyecto Green Corridor, lagami caba e trabou y mi no ta cobra nada pa esaki. Esey ta e mensahe cu Benny Sevinger, parlamentario y ex Minister di Infrastructura, a reacciona riba tur e ponencianan di e actual Minister di Infrastructura den un reunion di Parlamento diamars ultimo.
Un di e metanan di e reunion yama door di e propio Minister, tabata simplemente pa desacredita e proyecto di Green Corridor. Esaki tabata un di e proyectonan di infrastructura mas grandi cu Aruba a yega di conoce y “bo por a sinti un tipo di jaloezie cu e no ta haya credito pa e proyecto aki. Na di dos luga, a desacredita tur e expertonan cu a traha ariba e proyecto di Green Corridor, inclusive e departamentonan di Gobierno. Y a bin pidi placa pa e por bay cerca Minister di Finanza pa pidi placa. Cu ningun di tres el a logra. Pero si el a haci hopi fanfaria y pone duda den un proyecto asina grandi.
Pero na final e mester a admiti cu ta solamente un porciento di e proyecto no ta finalisa. Pa e 1% aki no por caba e proyecto, ta papia di bancarota. “Bo tin cu puntra bo mes si e Minister ta cabes pa maneha e 1% di trabou cu falta pa wordo haci den e proyecto aki. Solamente e 1% falta pa cuminsa cu e fase di mantencion di 18 aña cu ta stipula den e acuerdo. Si tin buraco den caminda, nan tin cu drechi, si tin un luz cu a daña nan tin cu cambie, si tin mata cu mester wordo corta, nan tin cu hacie. Esaki durante 18 aña largo, sin cu Aruba tin cu paga nada extra pa esaki. “Pa e 1% cu falta e Minister a bin Parlamento haci comosifuera e proyecto ta bay bancarota, mientras cu e mes a bisa kico ta e solucion, esta sinta na mesa, yega na acuerdo cu e contratistanan riba e puntonan di preocupacion.”
E Parlamentario a agrega cu “si bo no por handle e 1% ey, nami un “ter beschikking” y mi ta atende e 1% cu falta pabo. Mi no ta bisabo cu mi kier sinta riba bo stoel, solamente mi ta atende manera mi a atende e resto di 99% di e proyecto, sin cu mi mester a bay haci fanfaria den Parlamento, sin manda carta, sin ataca e ambtenaarnan. Tur e atakenan e ambtenaarnan y e PPP-Team sinta banda di e Minister, mester a wanta tur e insultonan ey cu nan no a controla e trabou. Si nan bisa algo, mañan e ta retira nan. Nan mester a sinta guli tur e insultonan. “ Pesey un biaha mas el a bisa cu si e mandatario kier critica su persona, e por hacie no mas y a ripiti e expresion “i don’t give a damn”. “Mi ta drumi anochi cu mi consenshi limpi.” Y el a bisa tambe cu si Minister Oduber kier e por persiguie pero no e trahadonan.”
