Ashan Tromp ta candidato di partido CURPA, el a emiti un comunicado di prensa caminda el a duna di conoce cu Miguel Mansur a bisa: “Un grupo di lidernan di sectanan Cristian a purba ocasiona un atentado contra nos democracia.” Un comentario cu por wordo cualifica solamente como dictatorial. Democracia ta duna nos tur e derecho di vocifera nos opinion y pa cualifica un protesta como un atentado contra nos democracia ta un expresion cu tin cu pone nos tur para keto y pensa. Si mañan Accion21 ta den gobierno esunnan di fe Cristian lo wordo persigui manera cu a pasa y ta pasando na Nicaragua. Pastornan sentencia y a cera nan iglesia Catolico.
Separacion di iglesia cu estado
Nos ta haña e idea di separacion di iglesia for di estado den e carta di Thomas Jefferson “I contemplate with sovereign reverence that act of the whole American people which declared that their legislature should ‘make no law respecting an establishment of religion, or prohibiting the free exercise thereof,’ thus building a wall of separation between Church and State,” un carta cu su intencion tabata pa ningun gobierno traha ley cu lo mete of limita e libertad di expresion di religion. E tempo ey Anglican Church tabata ta haya faboritismo door di e gobierno. Den otro palabra ningun religion den poder den gobierno por impone riba otro religion.
Religion por wordo clasifica como Ideologia subhetivo. Otro Ideologia subhetivo ta Ateismo, for di eynan comunismo a nace y den comunismo no tin luga pa religion.
LGBTQ tambe ta un ideologia subhetivo segun Ashan Tromp di CURPA. Nos por corda den nan protestanan borchi cu tabata bisa “si no tin igualdad no tin paz”. Nos por haci e pregunta unda e comentario di Miguel Mansur a keda? Ken por lubida e borchi cu e potret di defunto Betico Croes unda nan a haci un photoshop e bandera di LGBTQ. Esaki ta un falta di respet total? Defunto Rudy Croes ta un di nan cu a para firme contra e ley aki y a hasta hiba hues.
Den e articulo di Miguel Mansur nos por wak con su persona cu su ideologia subhetivo kier impone riba religion door di sugeri cierto cambionan di ley den respecto cu religion.
Locual separacion di iglesia y estado no ta, ta separacion di Dios for di estado. Ta evidente cu den nos escudo di Aruba tin un cruz cu ta simbolisa e fe di un pueblo Cristian y den nos florin nos por lesa “God zij met ons”. Esaki ta duna nos di compronde cu si Accion21 den gobierno nos escudo lo wordo cambia tambe paso e ta contra di e pensamento di partido Accion21. Tur cos ta cuminsa chikito y despues lo saca e huña. E carne bisti na lobo nan ta loco pa come e carnenan.
Un yamada pa benta e gobierno abao
Ultimo eleccion Aruba tabata mester un gobierno cu lo saca nos for di nos situacion financiero. LGBTQ a ‘hijack’ e temporada aki pa pusha nan agenda y actualmente pueblo di Aruba no ta corectamente representa den parlamento. Partido RAIZ a laga sa di no kier bay cassatie y ta pone presion den e coalicion cu ta forma gobierno. No ta un secreto publico cu den partido MEP den parlamento tin hende ta na fabor di e ley di matrimonio di mesun sexo. Nan no por tira piedra sconde man. Nos ta haci un apelacion na e parlamentarionan cu tin e poder y curashi pa tumba e Gobierno abao pa hacie sin miedo. Historia lo recorda boso como e unico parlamentario cu tabata tin e curashi di para pa principio.
