Gobierno y Fundacion ABO a inicia oficialmente e campaña Aruba Pink, tambe conoci como Aruba Hot Pink, cu un ceremonia di cendemento di luz pa aumenta e conscientisacion tocante cancer di pecho. E campaña ta pone enfasis riba prevencion, screening y deteccion trempan, asina como e sosten necesario pa pashentnan, sobrevivientenan y famianan cu ta enfrenta e impacto di e malesa.
Minister di Salubridad Publico, drs. Mervin Wyatt-Ras, a expresa su sosten pa e iniciativa y a destaca e contribucion di Fundacion ABO, anteriormente conoci como BOB Aruba, na e esfuersonan di screening di cancer di pecho na Aruba. Durante mas di un decada, e fundacion ta traha pa promove deteccion trempan mediante un programa di screening pa e poblacion.
E programa a haya impulso bou di e trabou di dr. Vanessa Williams, radiologo y co-fundado di Fundacion ABO. E meta ta pa identifica cambionan den e pecho na un fase inicial, ora cu tin mas posibilidad pa atende e malesa na tempo.
Wyatt-Ras a enfatisa e importancia pa personanan di 45 aña pa ariba presta atencion na nan salud y participa den e programa di screening. El a señala tambe cu Aruba tin facilidadnan medico, incluyendo e Centro Oncologico y e departamento di Radiologia di hospital, pa brinda diagnostico y tratamento na pashentnan.
Por su parti, Williams a splica cu e color ros di e campaña Aruba Hot Pink ta representa un yamado pa accion y un recordatorio di e responsabilidad cu cada persona tin pa cuida su salud. El a insta e comunidad pa tuma e invitacionnan pa screening na serio y no laga miedo of falta di informacion bira un obstaculo.
Williams a aclara cu screening ta destina tambe pa hende cu no tin sintoma ni dolor. Un mamografia por detecta cambionan chikito cu ainda no ta causa molestia. E informacion comparti durante e campaña ta indica cu e programa ta contempla mamografia cada dos aña.
E campaña tambe ta busca habri mas espacio pa combersacion tocante cancer di pecho, pa asina reduci tabunan y promove mas comprension den famia, entre amigo y den luga di trabou.
Gobierno y Fundacion ABO ta invita e comunidad pa participa den e actividadnan di conscientisacion y educacion durante e luna. E yamado ta pa no descuida e screening, busca informacion confiabel y reconoce e importancia di deteccion trempan den e lucha contra cancer di pecho.
Pa mas lesa TREMPAN.
