E tema di short-term vacation rentals tabata hopi tempo den discusion publico y tabata carece di un maneho claro, transparente, y organisa pa garantisa cu e sector ta funciona optimalmente, Cicilia a expresa. Pa e motibo aki, Gabinete AVP Futuro a tuma un decision pa introduci un maneho nobo pa e sector di short-term vacation rentals na Aruba. E tema aki ta sumamente interesante y importante pa e turismo di Aruba evolusiona y pa haci e acomodacion na Aruba evoluciona.
Balansa y Regulacion den Sector
E meta principal ta pa busca un balansa y introduci un maneho pa regulacion y structura e sector di short-term vacation rentals. E desaroyo aki ta crea diferente microeconomia y oportunidad pa e propio localnan por inverti, creando un producto adicional nobo pa e bishitantenan.
Proceso y Cooperacion entre Ministerionan
E proceso ta encamina pa varios minister, y Minister Wendrick Cicilia a expresa gradicimento na Minister Geoffrey Wever pa dedica hopi tempo riba e tema aki. E maneho ta forma parti di un esfuerso conhuntamente cu: Minister di Asuntonan Economico, Comunicacion y Desaroyo Sostenibel, Minister di Salubridad Publico y Minister di Innovacion y deporte.
Calidad y Normanan di Siguridad
Un punto clave di e maneho ta e garantia di calidad. Lo introduci normanan di calidad, siguridad, nivel di producto, y higiena pa e propiedadnan. Ademas, lo institui un Instituto di Control di Calidad cu lo eherce supervision pa cumplimento cu e normanan aki, sigurando cu Aruba como destino premium den Caribe ta cumpli cu e expectativa di e bishitantenan.
