Arkitecto Raffy Kock tambe tabata presente den e Aruba Investment Summit na Hulanda. E tambe ta forma parti di e team cu ta traha riba e desaroyonan cu Ministerio di Asuntonan Economico kier trece y su rol ta uno hopi importante den loke ta centro di ciudad di Oranjestad y tambe San Nicolas.
Kock ta bisa cu ora el a haya sa riba e evento aki algun luna pasa el a dicidi di inverti p’e bin riba su propio forsa pa wak kico ta pasando y ki tipo di sinergia por haya.
“Mi kier a bin mira ki tipo di profiel di inversionista tin y mi a mira cu e tabata un grupo hopi diverso y mixto.” E grupo cu Kock a haya mas interesante di tur ta e empresarionan tabata Rubianonan jong. “Eseynan tabata realmente esunnan di mas interesante cu a bini.”
Tin vision cu pa basta tempo caba ta estableci over di kico mester haci pa Oranjestad y San Nicolas. E team cu tin actualmente ta trahando hopi duro pa sigui realisa y crea espacionan di calidad den centro di ciudad di Oranjestad.
E plan di San Nicolas ta uno hopi interesante pasobra e ta bay den e curason di e ciudad, segun Kock. “Na unda actualmente tin e area di bus cu ta net bashi, anto eynan nos ta bay forma e puzzel pa crea mas coherencia den e ciudad,” Kock ta bisa. E tipo decisionnan di proyectonan andando Kock ta haya hopi interesante cual sigur lo yuda crea un miho Oranjestad y San Nicolas.
Riba loke ta edificionan existente cu tin, Kock a menciona e posibilidad pa duna nan un bachi nobo y asina tambe duna nan un uzo nobo. Kock a haya un tarea pa haci un documento visual pa un par di area na cuminsamento di Caya Betico Croes y bo ta wak cu e interes t’ey pasobra hendenan kier haci un diferencia. “Eynan nos por wak cu un uzo otro di diferente cos manera vivienda, comercio, kantoor, ta cosnan cu ta hopi relevante pa centro di ciudad di Oranjestad. Nan ta bay hunto cu e areglo di parkeer tambe.”
