Un candela den area di Playa a mobilisa unidad di brandweer mesora. Ta trata di un transformatorhuisje situa patras di Calypso Building, caminda un schakel lo a cende na candela.
Esaki a tuma luga den careda di 10:15 am ora cu a tuma nota cu coriente a cuminsa bay den area di corte. Algun colega di 24ora presente na corte relaciona cu diferente sentencia riba e dia di awe, a ripara cu e sistema di generator a kick in na corte, mientras cu nan tabata eynan. Na mes momento a mira unidad di brandweer presenta y asina a dirigi nan mes tambe na e sitio di candela.
A bin topa cu un transformatorhuisje na candela. Esaki tabata den e area patras di Caya Grandi, pa ta exacto patras di Calypso Building. Personal di ELMAR tambe tabata presente. Nan tabata den area di corte tambe cu trabou di mantencion y a core presenta na sitio di candela pa asisti cu e emergencia aki.
Un rato despues e situacion tabata bou control, a logra paga e candela y awo ta na ELMAR pa cuminsa e trabou di recupera di e daño y stabilisa e coriente pa e area afecta.
