2 Corintionan capitulo5:17 ta bisa: P’esey si un hende ta den Cristo, ta un criatura nobo e ta, e cosnan bieu a pasa caba,ata tur cos a bira nobo. Tene cuenta cu Dios a reconcilia nos cu Su mes door di Cristo.
Cada biaha cu nos haci cosnan cu ta identifica nos cu nos pasado, of mara na pasado di famia, of tradicion di organisacion, nos ta demostra cu no tin adelanto den nos pensamento, y cu bobedad a alcansa nos aunke nos ta sabi y nos ta bibando den otro epoca.
Pasobra pasado ta vengativo, pasado ta trece mal recuerdo, ningun memoria di pasado maligno,por yuda nos yega na e victoria den nos bida.
Nos mester laga pasado bay y no wak atras (Genesis 19:17), Dios no kier esey ( Isaias 43 :18;19), si nos tene cuenta hopi problema actual ta pa motibo di entre otro preocupacion, stress , y depresion ta bini di un mente cu ta mara na cosnan di pasado.
Hende ta gusta biba den pasado di otro, pero abo mes como ser humano tin cu laga bo pasado bay, pa asina bo drenta den e cosnan nobo, cu solamente Dios tin prepara pa bo.
Hende cu ta biba den nan pasado no ta gusta pordona, pasobra diabel ta gusta mantene hende den nan pasado, mescos cu un comunista ta biba di rabia riba democracia, pasobra e no tin nada nobo, ni un plan, ni un projecto, ni un pensamento, solamente cosnan bieu, cual ta lanta rabia y odio, esey ta su cuminda di tur dia.(Juan 10:10).
Nada no por wordo reconcilia den un hogar mientras cu pasado amargo ta cologa, manera un coyar di concret na nos garganta.(Hebreonan 12:14+15)
Si acaso algo a sosode den bo bida y bo a perde bo famia den un divorcio, bo no por forma un famia nobo cu e pensamento bieu, bo mester di yudansa di Dios, prome cu bo cuminsa forma e famia.
Pablo ta bisa den Filipensenan 3:12+13+14: No cu mi a alcansa esaki caba, of cu mi a bira perfecto caba, ma mi ta haci tur esfuerso, pa mi por gara e loke pa cual ami tambe a wordo gara door di Cristo Hesus. Rumannan mi no ta pretende cumi mes a gare caba, ma un cos mi ta haci lubidando loke ta keda atras,y aspirando loke ta dilanti, mi ta haci tur esfuerso pa alcansa e meta, pa haña e premio di e yamada, celestial di Dios den Cristo Hesus.
Ora bo no laga bo pasado atras bo nivel di bida ta keda abao, si bo laga bo pasado atras Dios lo trece adelanto den bo bida, pasobra e ta mira un curazon cambia, un curazon humilde.
Pablo kende tabata Saulo di Tarso mester a laga su pasado malbado atras, y gara na Cristo, y asina e por a bira Apostol Pablo kende a scirbi gran parti di Testament nobo cual awe nos tur ta siña for di dje. Lagando su pasado atras e a ricibi revelacion di Dios pa e por a scirbi.(Filipensenan 3:7+8).
Pesey un hende cu no por laga su pasado atras cu ta biba cordando tur dia , tin di haci e siguiente declaracion: Mi a wordo crucifica cu Cristo, ya mi no ta biba mas, mas Cristo ta biba den mi.(Galationan capitulo 2;20 y Galationan 5 :24-26).
Tin hopi plan den curason di hende, ma e conseho di Señor esey lo permanece.(Proverbionan 19:21).
Sinceramente, pastor Marcel Balootje.
