Dr. Horacio E. Oduber Hospital a organisa un anochi informativo di stroke na Centro di Bario Brazil. Na e anochi informativo a presenta 40 persona y pa esaki Hospital ta masha gradici. Ruthmila Odor-Croes, Zorgmanager B3 di Hospital a bisa cu nan ta contento di mira cu pueblo kier informacion.
Durante e anochi informativo a papia 2 specialista, un Neurologo y un Hospitalist, tambe presente tabata nursenan di departamento di neurologia y dietista cu a contesta preguntanan. E anochi tabata yena di informacion y hopi hende tabata kier a conta un tiki di nan experencia propio. Di esey empleadonan di Hospital ta siña hopi tambe.
Durante e anochi informativo dos famia tabatin sernan keri hopi hoben cu a haya stroke. Ruthmila Odor-Croes a duna di conoce cu un di nan tin famia genetico y esaki ta pone cu varios di e yiunan a haya stroke. Di e otro famia ta mirando si esey por ta e caso. Tambe a mira cu e edad di stroke ta bahando. Tin e strokenan A-tipico, esta no esunnan tradicional. Na e anochi informativo a enfoca mas ariba e strokenan mas comun cu tur dia nursenan ta mira, cual ta e stroke Ischemic.
Tambe dokter a splica con un persona ta haya stroke, pero tambe con pa reconoce stroke, con pa preveni y kico pa haci ora un pashent haya stroke. Den e publico presente tabatin boticario, kende a puntra riba remedinan pa stroke. Ruthmila Odor-Croes tabata hopi satisfecho y orguyoso di e team di hospital, cu a contesta cada pregunta. Tur cu tabata presente a keda satisfecho di a siña algo mas e anochi aki.
Na aña 2016 mas o menos 150 hende a haya stroke y na final di aña 2017 tabatin mas o menos 250, di cual e prome 6 lunanan di e aña aki ya caba ta yegando e cifra ey. E situacion ta hopi alarmante, el a duna di conoce. E motibonan pakico hende ta haya stroke ta bin door di e riesgonan di presion halto, mucho hopi hende na Aruba tin presion halto, mucho hopi hende ta diabetico, demasiado hende ta sobrepeso. E bida di stress cu hende ta biba cun’e tur dia, e ta duna di conoce pa busca e balans entre priva y trabou pasobra tur hende kier ta exitoso den bida pero no por ta exitoso si no tin balans den bida.
Hospital ta spera cu e mensahe di e anochi informativo yega cerca hopi hende. Tambe cu e mensahe yega cu hopi cos y cu cada hende por preveni hopi cos. Esaki ta den man di cada persona. E resto ta genetico, sexo etc cual ta cosnan cu no por controla.
A siña nan riba e VAST, cu nan ta mira si e cara ta cay, mira si ambos man ta hisa, mira si e persona ta papia manera burachi. E personal medico di hospital a haci ehercicio y e publico presente tabata fantastico. Nan sa cu ora di mira un di e sintomanan aki, mester yama 911 y acudi hopi lihe y yega bisa na Spoed Eisende Hulp cu e ta kere cu su famia a caba di haya un ataca di celebro, un stroke.
Hospital ta gradici Centro di Bario Brazil pa duna nan e oportunidad pa organisa e anochi informativo, pa asina nan por a yega na cada un miembro di e facilidad di hospital. A gradici dr. Weiser, dr. Dave Laclé, Brian Kock, Alona, Julie, Geraldine y Hortencia pa tur nan esfuerso.
