Amado Rosina ta e tata di festival Voz-i-landia, cual recientemente a keda anuncia cu lo bini bek pa 2025 anto den gran forma. Voz-i-landia ta un festival di musica escolar cu tur scol basico ta participa cu alumnonan den respectivo categorianan den e festival.
“Tempo cu mi a cuminsa cu Voz-i-landia nos tabata skirbi areglonan gratis, nos no ta cobra niun hende pa hopi aña, nos a cuminsa cobra ora a haya sa cu tabata tin hende ta cobra,” segun musico Amado Rosina ta bisa. Rosina ta splica cu e festival aki ta uno tremendo pasobra for di dje a sali cantantenan cu a bira grandi na Aruba.
Un di e prome festivalnan na Centro di Bario Dakota den añanan 1970 cu un orkesta chikito, a conoce participacion di defunto Hildward Croes por ehempel. Musica ta e unico cos cu tin na mundo cu ta universal, y Rosina ta spera cu por cuminsa haya respet p’e palabra musica, pasobra no tin respet. E musico ta mira manera un hende cu no por haci nada anto a kies pa toca pasobra e no sa nada.
“Nos tur a bay scol y haci tur cos. Dios a buta nos cambia bira musico, nos no a bira musico pasobra nos no sa nada.” Ivan Quandus ta un musico cu tambe a pasa bao di Amado Rosina, awor ta un di e miho grabadonan cu bon conocemento di grabacion profesional y hasta Rosina mes tin cu puntr’e cos awendia.
“Ken cu ta no ta skirbi musica of aregla, of lesa score. Bo ta bay keda asombra con mas dificil e cos aki ta cu 80% di otro trabaonan.”
Rosina lo cumpli 71 aña na september venidero y ta haya cu mester bisa e cosnan aki pa no bay sin bisa nan, y ainda e falta hopi cos pa bisa.
REGRESO DI VOZ-I-LANDIA TA ALGO FENOMENAL
Cu regreso di Voz-i-landia ta algo super great segun Rosina pasobra tabata tin bosnan hubenil di calidad halto e tempo ey. Rosina a recorda tambe riba e honor di dirigi un orkesta na Acapulco, un experiencia cu e ta bisa ta uno hopi memorabel. Por ta hende ta pensa cu ta co’i loco pero eynan Rosina ta bisa cu bo ta haya luz berde y cora mescos cu trafico. “Ora luz cora cende, si bo ta cla of no bo mester baha, drecha cos y bini bek.”
Rosina ta expresa cu e ta hopi contento cu Fundacion VOZ-I-LANDIA Escolar ta organisa esaki bek. “Ami t’ey semper pa yuda e muchanan.”
