Manera nos a publica algun dia pasa, tin un proces-verbaal data riba 29 di september 2023 unda ta relaciona cu detencion di activista Nigel Maduro cu a spuit riba atraccionnan turistico: NO MORE HOTELS.
Minister di Husticia a laga sa caba cu e of ningun di su hendenan a pone presion pa cera Maduro, siendo cu tin informacion riba papel cu ta indica cu algo no a bay aparentemente via procedura normal ora a atende cu e situacion aki.
Segun drs. Ramon Arnhem, Altocomisario di Polis, e no ta na altura riba e situacion aki pero si cos a bay manera ta bisa, cu via un yamada di telefon lo mester a pone poco presion pa duna e caso aki prioridad, lo tin cu bay wak esaki di cerca y investiga si cosnan aki ta klop prome. “Esey no por ta e manera pasobra no ta asina cos ta traha, ta ministerio publico ta duna direccion riba investigacionnan y nos ta despues ehecuta esaki, ningun hende mas,” segun Arnhem.
Dus riba si esaki ta procedura normal cu yamada ta bini for di gobierno pa Cuerpo Policial pa duna prioridad riba un caso, esey no ta e manera con cos ta traha pero altocomisario ta bisa cu mester bay wak prome si e informacion aki ta klop cu realidad precisamente.
Awor lo tin cu bay mira kico precisamente a sosode y di unda a sali cu e informacion aki of unda cos lo por a bay robes si tabata tin algo cu no a cana bon den e caso aki segun altocomisario ta afirma.
