Diahuebs anochi algo pasa di 9or habitantenan di Tanki Leendert, Calbas, Seroe Alejandro, Rooi Kochi y algun parti di Savaneta a keda sin coriente. For di trempan WEB a informa 24ora.com cu e fayo no tabata cerca nan planta. A tuma contacto cu N.V. Elmar pa informacion kico por a sosode pero ningun ehecutivo tabata disponibel pa duna comentario.
Riba Facebook e compania di suministro di coriente a informa un bon rato despues cu un mata lo a mishi cu liñanan di coriente, esaki a causa un kortsluiting den e area afecta pabou di brug.
Tecniconan a sa di resolve e problema rapidamente.
Pa e area di pariba di brug e situacion tabata mustra algo mas complica, pues N.V. ELMAR a informa cu tecniconan tabata na altura di e fayo den area pero no por a duna un idea con largo consumidornan lo keda sin coriente.
