Aruba Hotel and Tourism Association (AHATA) a reuni dialuna cu e comision fiho den Parlamento cu ta atende e asunto di cambio ley pa Serlimar. Na final e organisacion di hotel y turismo a keda cu e comision cu ta miho haci un estudio nobo, independiente, di un compania Mericano relaciona cu e opcionnan den maneho di desperdicio. Cu esey e Fraccionnan den Parlamento y AHATA a acorda cu lo NO yama e reunion publico ainda, tanten cu no tin mas informacion y claridad di estudionan haci riba e forma pa procesa desperdicio.
E comision den Parlamento tin e nomber di “Comissie Financien, Economische Zaken en Overheidsorganisatie” y ta presidi pa Parlamentario Daphne Lejuez di e Fraccion di MEP. Tabatin representacion di tur 4 Fraccion den Parlamento (AVP-MEP-POR-RED), mientras cu AHATA a conta cu participacion activo di su Hunta di Directiva y nan Presidente/CEO, esta Tisa LaSorte-Henriquez.
AHATA a duna di conoce cu nan a haya un bon oportunidad pa por comparti nan preocupacionnan relaciona cu e proposicion di cambionan den e ley di Serlimar, cu ta pendiente contesta di preguntanan di Parlamentarionan dialuna awor, pa despues Gobierno contesta y siguientemente pa trat’e den Parlamento. E cambio den ley lo encera introduccion di cobransanan adicional, incluyendo pa e turistanan via un “Tourist Levy” y lo forma un plataforma ideal pa Gobierno por introduci un Incinerator, como nan solucion pa maneho di desperdicio riba nos isla.
E proyecto di Incinerator, pues den cual lo kima sushi na Aruba, lo por costa alrededor di mey biyon florin (Afl. 500.000.000,00) y lo bin cu un posibel aumento drastico di “tipping fee” pa clientenan residencial y comercial, banda di e 25 florin cu ta pagando awor pa recogemento di sushi domestico semanalmente.
Daphne Lejuez a duna di conoce riba su pagina di Facebook cu esaki tabata un di e prome reunionnan den un rueda di consulta cu e comision lo haci cu parternan envolvi. AHATA tabata e prome pasobra nan mes a pidi pa scucha nan preocupacion, preguntanan y hasta e sugerencianan cu a bini padilanti. Ta intencionn pa scucha mas organisacionnan, gremionan y posiblemente hasta bisiñanan cu tambe tin un opinion riba e proceso aki. Locual ta e liña cora entre tur e gremionan ta, cu no kier bay bek na e formula anticua di kima sushi sin mas riba dump na Parkietenbos.
Actualmente tin un discusion pisa den comunidad y den seno politico riba e opcionnan Minister Otmar Oduber ta na fabor di un Incinerator, aunke cu despues di lunanan di destaho publico, cu mas o menos 17 compania cu a busca e destaho, na final NINGUN a participa den e proceso. Esey tabata bisto pasobra e garantianan di Gobierno pa cumpli cu e pagonan, banda di e forma con e compania lo saca su inversion bek no tabata mucho cla den e “Request for Information”. Tanten cu Gobierno no cambia e reglanan di wega, por ehempel den cual ta laga habri pa e compania mes fiha su “tipping fee” y laga WEB negocia un tarifa aceptabel den cual ta cumpra e coriente bek y laga habri cu e compania por importa sushi di otro pais pa por kima na Aruba, cu e interes lo keda limita of nihil. Realidad ta cu Aruba ta produci poco sushi pa por kima y converti den coriente, manera ta conoci den e industra di “Waste to Energy”.
Di otro banda, algun siman pasa EcoGas a anuncia cu nan a forma un MoU cu e compania Argos na Colombia. Ta trata aki di e compania mas grandi di henter Latino America y e di 4 mas grandi di Merca, den produccion di cement. Nan ta interesa den e Envirobalesnan cu EcoGas ta produci despues di separa, recicla y procesa e desperdicio na su planta, pa por uza como combustibel den nan fornonan di cement na Colombia. EcoGas a garantisa cu e procedura aki lo costa mesun tanto cu awor pa procesa e sushi y der’e den e buraco grandi na Ser’i Tijshi. E proposicion riba mesa ta pa exporta e RDF pa Colombia como plan A y como plan B sigui yena e buraconan, cu hunto (nan ta varios) lo dura riba 100 aña pa por tapa nan.
E tema aki di cambio di ley di Serlimar ta cana man den man cu tur e plannan riba mesa pa Reforma Fiscal y cobransanan adicional pa servicionan di Gobierno. Camara di Comercio por ehempel a expresa algun dia pasa cu e situacion economico ta di tal indole cu no por acepta mas medida ni mas cobransa na comercio. Nan kier mira con Gobierno mes ta cuminsa economisa den nan propio operacion, prome cu pasa tur gasto na sector priva. Den e plan di Serlimar, ta pensa di cobra 25 florin na cada negoshi inscribi na Camara di Comercio, pues 300 florin pa aña, separa di e cobransanan mensual pa recogemento di sushi. Si tene cuenta cu lo bin un aumento den “tipping fee” si sigui cu e plannan di Incinerator, anto ta obvio cu henter e industria aki di desperdicio lo percura pa hopi entrada pa Serlimar y hopi gasto adicional pa comunidad y pa sector priva en especial.
