Ex trahado di SETAR residencia na Florida, esta Egbert Yvan Ferdinand Koolman, naci na Aruba, di 49 aña di edad, a declara su mes culpabel di acusacionnan di labamento di placa na luna di April ultimo, en conexion cu su rol den un plan pa organisa y ricibi pagonan coruptivo pa influi den e contractnan di compra di celular na Setar. A acus’e di conspiracion di comete labamento di placa. Awe el a tende di Hues na Miami cu a sentenci’e na 3 aña di prizon.
Di acuerdo cu admisionnan haci, como parti di su acuerdo di culpabilidad, entre aña 2005 y 2016, Egbert Koolman a opera un conspiracion di labamento di placa desde su puesto como “Product Manager” na SETAR. Koolman a admiti cu, como parti di e plan, el a conspira cu Parker y otronan pa transferi fondonan for di Florida y otro camindanan na Merca pa Aruba y Panama, cu e intencion di promove un plan di fraude electronico y un plan coruptivo cu ta viola e “Foreign Corrupt Practices Act” (FCPA).
Egbert Koolman a admiti na Corte di Florida cu el a priminti y a ricibi soborno for di individuo y companianan situa na Merca y den exterior, a cambio pa uza su posicion na SETAR pa otorga contractnan lucrativo di celular y acesorio. El a ricibi pagonan coruptivo via “wire transfer” for di banconan situa na Merca, en efectivo durante reunionnan na Miami y na Aruba y door di lanta placa na Aruba, uzando un carchi di banco cu por saca placa for di un cuenta di banco Mericano.
Na tur el a ricibi no menos di $1.3 miyon na pagonan coruptivo. Tambe e mesun acusado aki a admiti na Corte cu el a proporciona proveedornan faboreci cu informacionnan confidencial di SETAR.
