Un rato pasa a sosode un caso serio di menasa den Hendrikstraat den centro di ciudad. Polis a yega na e sitio y a topa cu e adicto conoci como “Pop” net patras di edificio di Corte. Un victima a conta Polis cu e adicto a pidi’e pa placa y ora cu el a nenga, e adicto a saca un cuchiu mas grandi mes riba dje!
Polis a topa cu e sospechoso y a hay’e cu e cuchiu den su poder. A detene mesora na e sitio pero esaki no a bay facil. No solamente pasobra e sospechoso a rebeldia, sino tambe pasobra cu e Chef van Dienst (Wachtcommandant) a bira loco ora a tende cu a detene Pop. Para na e sitio nos por a scucha con e Hefe na turno a zundra e agentenan di Polis cu a efectua e detention na e sitio, argumentando cu nan no kier e adicto ey den Warda di Polis y cu mester a lag’e den libertad. Claro cu e Polisnan no a sigui e ordo aki y a transporta e homber cu arma blanco pa Warda di Polis pa toch present’e na e Sub Fiscal.
E demas Polisnan cu a bin pa brinda refuerso na e sitio a cuestiona con un hefe ta baha su mesun Polisnan di tal forma riba radio pa tur scucha. Ta asuntonan cu mester a regla paden ora cu a yega cu e sospechoso cu a saca cuchiu pa un hende inocente. Ta parce cu e hefe na turno awor kier scoge cua sospechoso e kier atende cune y cua mester sali liber mesora sin cana e procedimiento penal.
E reglanan ta determina cu na momento cu un Polis detene un sospechoso, hink’e den boei, cu no por bira lag’e bay sin mas. E tin un proceso cu mester cana internamente. E forma nobo aki di traha ta crea prescedente pa futuro, algo masha peligroso mes!
