Sindicato Union Portuario Arubano (UPA) ta hopi disgusta cu gerencia di Astec. E disgusto ta pa e forma con nan ta bisa cu gerencia ta atendiendo cu e situacion di e barconan cu ta mara.
Dave Franken, vocero di UPA den un declaracion manda pa prensa ta bisa cu despues di dos reunion cu gerencia di Astec y un reunion cu gobierno, awe sindicato UPA ta bati alarma na Gobierno. E motibo di nan malcontento ta pa e forma cu nan ta bisa cu gerencia ta laga Operation Department atende e barconan.
Segun Franken, Gobierno mes ta anuncia pa keda cas mas tanto posibel, y en bes Astec pone Gantry Operator atende e barconan cu ta drenta waf a haya ta bon pa spaar overtime. Asina por ehempel, nan ta pone trahadonan sin experenscia y cu ta traha hopi slow traha den tempo di crisis. E barconan cu por caba di atende cu nan pa 5or/6or atardi ta bay te 12 or anochi poniendo e trahadonan mas tempo den contacto cu e tripulantenan di barco sin tin mester. P’esey di parti sindicato UPA tambe a trece dilanti pa gerencia laga e barconan pa un temporada baha eynan so y bay, loke a yega di pasa caba den pasado na waf na Playa. “Den bista di UPA, e director falta experencia pa atende un situacion asina.
Tambe UPA ta reclama e odisea cu e miembronan tin di cana tur dia y compartiendo 1 porta cu tur tripulante cu tur su consecuencianan. Gerencia a duna handsanitizer y mondkapje y 1 latex clove cual DVG a bisa cu no ta proteha completo. Mas ainda si e trahadonan tin contacto cu tripulantenan di afo. Sindicato UPA ya a papia cu gobierno riba e situacion aki pa intermedia pasobra gerencia no ta tumando e puntonan cu UPA a trece pa protege su miembronan na serio. Si gerencia no ta bin cu cambionan mas pronto posibel, no ta keda e trahadonan nada otro pa tuma accion y cu tur consecuencia pa servicio pa e barco y e carga.
