Corte awe a trata e caso contra e homber Ashley Gumbs, cu aunke e ta den libertad caba, e tin algo duro ta sper’e, principalmente pa e parti financiero.
“Mi sa loke cu mi a haci no ta bon,” el a bisa diferente biaha sinta den Corte dilanti un hues femenino.
E acusacion cu fiscal a trece contra dje tabata cu el a maltrata un persona riba 9 di october 2020 y destruccion di auto di un otro persona riba e mesun dia. E partido afecta den e caso aki, doño di e auto, tambe tabata den sala pa entrega su demanda.
Ora cu hues a repasa e documento, a mustra cu el a ranca e señora na su paña y su cabey, despues el a bay pafo y pa motibo cu e muhe no kier a bis’e di kende e auto pafo ta, el a pasa man cu un martiu suta e auto cu ne.
Pero e pret den e caso aki ta cu tur e agresion di e acusado a bini despues di un discusion cu su pareha. E motibo? E pareha a bin hay’e cu un otro muhe den e apartamento. E ex a cuminsa reclam’e y el a perde tur control. Un parti di su caracter cu e tin problema pa domina.
Hues a hala su atencion tambe pasobra el a bisa cu e ta paga daño na e auto, pa cual a lag’e liber. Pero ora cu joncuman a sali, e no a corda mas riba su debe. Awe dilanti mesa berde, el a haya e sla fuerte, pasobra ta basta e tin cu bay paga.
Hues a puntr’e tambe si e ta dispuesto pa bay un curso di agresion, cual mesora el a contesta cu si.
Fiscal a bisa e acusado no tin awa pa laba, tur prueba t’ey. E mes a admiti di a ranca cabey di e muhe, di su paña, kibra e auto, etc. Pa esaki el a dun’e un castigo di 60 dia di cual 52 ta condicional y 2 aña di prueba.
Corte a bay di acuerdo tambe cu ta nifica cu e no mester bay KIA bek. Pero e mester traha pa paga e debe cu el a haya awo. Corte a bay di acuerdo cu e suma di casi 20 mil florin na daño cu su victima a sufri cu e destruccion y gastonan relaciona cu esaki. El a priminti cu e lo paga.
Ambos, e acusado y e victima di destruccion a sali hunto di Corte, pero caminda separa.
