Manera ta conoci, den e periodo di juni te september, Cruz Cora Aruba, CEDE Aruba y FPNC a traha hunto pa yuda mas famia posibel pa medio di e fondonan di Ministerio di Asuntonan Interior y Relacionnan di Reino. Durante e tres luna aki, e organisacionnan aki por a sostene 7.438 hogar cu e-voucher, paketenan di cuminda y cuminda cayente. Tur dos organizacion ta contento cu e resultado aki.
Dia 18 di september e contracto entre Cruz Cora Aruba, CEDE Aruba y FPNC a caduca y no a wordo prolonga. Pa e siguiente temporada, Cruz Cora Aruba lo usa e fondonan di Gobierno di Hulanda pa traha solamente cu e-voucher (carchi digital pa haci compras) y cuminda cayente. Lo no sigui mas cu pakete di cuminda for di e fondonan di Gobierno di Hulanda na e momento aki.
Cruz Cora Aruba lo sostene por lo menos 7.500 hogar cu e-voucher y tambe lo sigui cu cuminda cayente. FPNC lo sigui cu paketenan di cuminda cu sosten di CEDE Aruba y otro fuente di sosten. E meta di FPNC ta pa sostene por lo menos 2.500 – 3.000 famia pa luna cu ta registra cerca nan caba.
Te cu fin di siman pasa, ainda tabata tin un cantidad di producto di comestibles cu ta pertenece na e contracto anterior. Pesey Cruz Cora Aruba y FPNC a firma un acuerdo pa FPNC por usa e productonan aki pa completa mas o menos 3.000 pakete di cuminda. VNO y CEDE Aruba tabata presente y tambe a firma e acuerdo aki.
