“Mientras fundado di Partido MEP a lucha cu alma y curason pa nos Status Aparte, awor su sucesornan di partido a para bira un berguensa, dispuesto di debilita nos institutonan mas ainda”, asina lider di Partido Accion 21, Miguel Mansur, a vocifera awe. E ta lamenta cu nan kier cobra salario di parlamentario, biaha rond mundo representa parlamento pero na mesun momento nan ta feliz pa debilita e organo mas halto di nos sistema democratico pasobra ta nan interes ta bin prome cu tur cos, completamente contrario na e idealnan di nan fundador.
Mansur ta corda con ex-Presidente di Parlamento mr. Ady Thijsen a bergonsa Parlamento ora a permiti un voto pa baha ex-minister Marisol Tromp sin 11 miembro presente. “Ora gobernador a mand’e anula e decision el a purba sconde e carta pa mas cu un aña pero si el a percura pa su ruman cu a perde trabao, pa e haya un trabou den parlamento, aparentemente cu bendicion di DRH, caminda su ex-casa ta director. Esey tabata den interes nacional?”, esey ta locual Miguel Mansur ta puntra su mes.
Pero esey no ta tur, e presidente actual, mr. Edgard Vrolijk, cu Miguel Mansur ta considera “e payaso mayor”, ta dispuesto di mal uza su posicion pa preveni parlamento haci su trabao di representa pueblo y trata leynan pendiente. “E hipocresia no tin fin… MEP a bay cassatie pasobra nan tabata kier e wetgever tuma decision riba matrimonio di mesun sexo, Prome Minister te awe no kier comparti e conseho cu el a haya pa gasta placa di pueblo pa purba nenga ciudadanonan nan derecho constitucional. Ora e wetvoorstel a yega parlamento, fraccion di MEP no tabata kier pa e ley sigui te despues di decision di Hoge Raad (y e placa cu boso MinPres a caba di gasta pa bay cassatie pa parlamento tuma e decision???). E ley ta cla pa trata desde 9 di october 2023 pero algun miembro cu ta cobra tur luna no kier haci nan trabao”.
Miguel Mansur a sigui bisa cu “Awor, segun nan, leynan mester pasa comision prome cu nan ser trata. Ni presupesto di pais Aruba, e ley mas importante, ta pasa comision, corda otro wervoorstel. Awor supuestamente Edgard Vrolijk ta depende di un inocente, cu dificilmente por pensa pa su mes, pa cumpli cu e trabao cu pueblo ta pag’e. E nuebe parlamentarionan di MEP lo debolbe nan salario di october, november, december, januari, februari, maart pa obstrui nos democracia di funciona?”
Pero mas cu tur otro cos, Miguel Mansur di Accion 21 kier sa: “Unda liderazgo a keda? Esaki ta e nacion democratico cu nos fundado a imagina??? Un berguensa cu un set di payaso ta bin denigra e pais cu nan ta wordo paga pa sirbi! Nan ta asina malo den disimula cu diabierna nan a core saca un invitacion pa un reunion di comision diamars riba cambio na e kiesverordening. Boso por kere cu nan a lubida di invita Electorale Raad??? (not a joke)”
Miguel Mansur ta considera henter e asunto aki como un bon comedia, si no ta e mesun hende nan aki ta tumando decision riba nos futuro y futuro di nos pais.
Por ultimo, Mansur a conseha Ursell Arends di Raiz cu “RAIZ = better late than never. Ban cera e circo pa nos biba miho!”
