Abogado Lejuez: Polis ta acusa Prensa pa radio cu nan mes a “perde”

Dia 15 di juli awor pa 8.15 di mainta Nelson “Speed” Andrade, Marko Espinoza y Kennth Rasmijn lo haya sa kico Corte a dicidi den nan caso relaciona cu Portofon di Polis cu a wordo uza di forma “indebido”, segun Ministerio Publico.

Un caso masha largo, di casi 8 ora, unda cu Ministerio Publico a presenta cu dos Fiscal pa final conclui cu no por prueba ‘Verduistering” di P012. E unico acusacion cu OM ta kere cu nan por prueba ta “heling”, cu ta encubrimento. Un acusacion cu ta nifica cu bo a haci uzo of tuma algo cu ta procedente di robo of cu bo por a sospecha cu el a wordo horta. Pero esaki mes,. Abogado Chris Lejuez a bisa cu no a keda proba tampoco.

E investigacion aki a cuminsa ora cu vocero di polis Lito Lacle a traha un rapport bisando cu el a haya un tip cu den Cantaloupestraat tin un portofon di Polis cu ta perdi. Algo totalmente diferente cu loke e Centralista, cu a ricibi e yamada di e tip, a pone den su rapport.

 

 

For di Corte: Awe ta tratando caso penal cu Minister Bikker a ordena contra miembronan di prensa. Abogado mr. Chris Lejuez a defende 24ora.com y abogado mr. Demis Illes a defende e Polis, Kenneth Rasmijn.

Posted by 24ora on Monday, June 24, 2019

Segun e prome rapport aki, un persona a yama y a puntra pa Lito Lacle, di Departamento di Comunicacion, pasobra e tin informacion cu na cas di Marko Espinoza tin un portofon di Polis. Por mira cu for di prome instante tin un bruhamento di informacion.

Despues di a ricibi e tip a cuminsa investiga unda y di kende P012 ta. E ta registra riba nomber di Kenneth Rasmijn. Pero cada biaha cu nan a bay busca na su oficina, a haya e portofon bunita poni eyden. Con por ta posibel, el a puntra Hues, cu den PV ta para cu GPS a registra señal di P012 den bisindario  di Cantaloupestraat y Westraat, mientras cu niun biaha e mesun GPS ey no a registra ora cu e tabata tin e portofon cun’e na su cas. “P’ami, algo no ta cuadra aki.”

E Polis ta nenga rotundamente cu el a duna Speed e aparato, sea bende of a prest’e. “Nunca,” el a bisa.

Marko Espinoza a para riba su declaracion duna na Landsrecherche, pero e ta bisa cu el a wordo presiona, cu lo percura pa su mama no haya e documentonan necesario pa keda permanentemente na Aruba. Fiscal den su reaccion a bira bisa “e Polisnan na Landsrecherche ta hendenan integro. Y pa e dos Polisnan ey, mi por pone mi man den candela pa nan”. Abogado Lejuez a mustr’e cu ta miho e no haci esey pasobra e lo por kima. E Abogado, kende a representa tanto Andrade como Espinoza a laga un bom cay pa mustra cu e Polisnan aki si por wordo influencia y cu si e caso aki tin un tinte politico (ademas di rivalidad entre prensa opositor). Mr. Lejuez a entrega na Hues y Fiscal copia di loke un Minister a publica riba Facebook. E publicacion ta bisa “Ami si ta kere den husticia di Aruba. Y un hende cu no a nace na Aruba no ta cambia mi pensamento riba esaki.” E prome persona cu a LIKE e post aki tabata e principal Recherche cu a interoga e acusado Marko Espinoza. “Marko Espinoza no a nace na Aruba y el a bisa den un declaracion cu el a wordo presiona door di e Recherchenan,” Abogado Lejuez a splica Hues. E dos Fiscalnan no por a splica pakico funcionarionan cu e ta bisa ta neutral ta bay LIKE un publicacion di un Minister relaciona cu e investigacion.

E Abogado a cuestiona con a simplemente dirigi henter e investigacion aki riba su clientenan, mientras cu tin 4 pa 5 portofon perdi. A haya e portofonnan aki durante investigacion pero niun hende sa di kende nan ta of kende a perde nan. “Di con tanto enfasis riba P012? Di con no ta investiga P015 cu tin basta tempo perdi y niun hende sa unda e ta?”

Speed Andrade na final den su ultimo palabra a bisa Hues cu semper el a tende di kico cu OM no ta neutral. “Tur e kehonan ey mi a scucha cu un banda di orea so. Pero awo mi sa miho,” el a bisa. El a splica a daña su nomber cu el a crea durante 30 aña largo, bisando cu el a horta of cumpra un portofon. “Nunca nan a haya’mi cu un portofon of a haya un portofon na mi cas. Pero nan a detene’mi si.” Speed no a duna un declaracion na Polis y tampoco dilanti Hues. El a bisa: “Nunca mi a divulga mi fuentenan y nunca mi lo hacie. Dia cu mi papia riba mi fuentenan mi por wel di bay mi cas y drumi riba cama sin haci nada.”

OM den su rekisitorio a papia di informacionnan tecnico di ley, di con ta peligroso pa personanan cu no ta Polis scucha loke ta pasando. Riba e punto aki dado momento por a scucha un radio di Polis sonando den e sala. Tabata trata e celular di Abogado Lejuez riba cual e por a scucha Polis di Merca papiando. Asina, el a bisa, tin 80 aplicacion cu cualnan rond mundo por scucha Polisnan papia. “No ta trata di combersacionnan di Teamnan special, manera Team di Aresto, pero di accidentenan di auto, atraco, maltrato, etc. Cosnan comun y coriente.” Y ta parce cu Fiscalnan no conoce e comunidad, e Abogado a bisa, pasobra ainda awe despues di e investigacion, prensa ta haya informe di tur e sucesonan.

Pero pa OM esey no ta importante y ta haya cu e periodistanan a haci uzo di un portofon cu no ta di nan y un portofon mobiel di un ex auto di Polis pa scucha combersacionnan policial. Pa esaki nan mester wordo castiga. Pa Andrade cu tin un rol mas grandi, el a pidi 240 ora di trabou pa comunidad, 2 luna di prizon condicional y 3 aña di prueba; Pa Marko Espinoza 180 ora di trabou pa comunidad; y pa Kenneth Rasmijn tambe 240 ora di trabou pa comunidad.

Hues a cera tratamento di e caso y lo dicta sentencia 15 di juli awor pa 8.15 di mainta.

Comments

comments