Abogado Figaroa: A logra bon pakete pa empleadonan di La Linda

Abogado Hose Figaroa, representando e trahadonan di La Linda NV, a bisa cu na final nan ta contento di por a yega na un areglo na mesa, pa finalisacion di relacion laboral, sin cu mester tuma pasonan mas leu.

Manera ta conoci, na final di aña pasa e trahadonan a haya informacion cu La Linda ta bay cera su portanan. Mesora e mas cu 30 trahadonan a acerca nan pa intermedia y mira cu ta respeta nan derechonan. E tabata un situacion hopi dificil, pasobra tabatin trahadonan cu 45 aña di servicio. “Pero na mesa nos a logra yega na un acuerdo,” mr. Figaroa a bisa.

 

Durante e negociacion, a logra saca pa cuminsa varios luna di salario pa e empleadonan. Asinanan, apesar cu a manda nan cas, a logra cu ta paga nan salario te cu fin di mei. Ora cu e luna ey a yega, a bolbe sinta na mesa y acorda cu e propietarionan ta paga nan añanan di servicio. Banda di esaki, a otorga un compensacion na cada un, dependiendo di e cantidad di añanan cu nan a labora.

Pues a haya nan salario te cu mei, a paga nan añanan di servicio y a duna nan un suma adicional. A keda di paga e suma aki den algun fase, faltando un parti so pa wordo paga.

E situacion di La Linda no tabata optimal y no ta mas manera antes. A yega momento cu mester a haci reduccion den personal y a logra cu e trahadonan manda cas, a haya loke nan merece. Asina e relaciona di trabou a keda finalisa di mutuo acuerdo. 

E negoshi ta den operacion ainda, pero cu un cantidad  minimo di empleado.