Despues cu Corte di Prome Instancia a bay di acuerdo pa transmiti e sentencia den caso di Paul Croes y despues di esun di Benny Sevinger, awo a sali un peticion di prensa pa haya mesun trato pa e caso Flor. Ayera corte a manda un email pa abogado di ambos grupo di bringadonan, pero e bufete di abogado Croes, Wever & Ruiz, cu ta defende Kevin Wever y su sua, a protesta mesora mientras cu esunnan cu ta defende rumannan Williams no tin problema pa pueblo mira y scucha e sentencia bibo. “Si nan no scuch’e eyden nan lo hay’e oa mira pafo, ta kico ta e diferencia”, tabata comentario di famia di un di e acusadonan den e caso.
Pa famia Williams, ta importante pa e berdad sali afo y pa pueblo mes husga, hunto cu e hues, ta yiu di ken a “hecha baina”. Pasobra tabatin tiramento cu boter den restaurant, te cu a herida e coki. Famia Wever sa bon ken a haci esey pero kier tapa e berdad pa berguensa y pa evita daño di imagen politico.
Tur cos ta keda awo den man di e Magistrado, cu lo tin e ultimo palabra den e asunto aki.
E caso
Dia 3 di april 2023 Corte den Prome Instancia a cera tratamento di e caso penal contra cuater sospechoso acusa di a comete violencia den publico. Ta trata aki di Yowalfre Torres-Mendez (22 aña) y Kevin Wever (27 aña) y e rumannan Nigel Williams (33 aña) y Chris Williams (34 aña).
Ta acusa e sospechosonan aki di a uza violencia den Azia Restaurant na Palm Beach riba 14 di november 2021. A tira cu stoel, boter y glas y a causa destruccion den e establecimento hopi bishita aki. Tambe ta acusa e sospechoso yerno di minister-president di a herida un trahado di e restaurant seriamente cu un boter.
Demanda di castigo
Ministerio Publico a exigi contra e sospechoso Torres-Mendez un castigo di 230 ora di trabao pa comunidad plus un castigo di prizon condicional di tres luna cu un tempo di prueba di dos aña. Cu castigo condicional kiermen cu e no mester sint’e, solamente si e comete e mesun delito den e periodo di prueba di dos aña.
Contra e sospechoso Nigel Williams, fiscal di husticia a exigi 176 ora di trabao pa comunidad y un castigo di prizon condicional di un luna mas dos aña di tempo di prueba y contra e sospechosonan Kevin Wever y Chris Williams a pidi 148 ora di trabao pa comunidad y un luna di castigo di prizon condicional plus 2 aña di tempo di prueba.
A ataca nos industria turistico
Fiscal di husticia a enfatisa den su rekisitorio cu e caso aki, cu ta conoci como ‘Flor’, tabatin gran impacto riba comunidad y por a resulta hopi malo pa e imagen di Aruba como destinacion turistico sigur. E restaurant ta keda cerca di e asina yama highrise hotels y tabata sirbiendo na e momento ey tanto huespednan turista como local. E pelea a hiba na caos y panico bao di e huespednan, bao di cual tabatin tambe muchanan. Fiscal a bisa cu ta un milager cu no a cay mas herido e anochi ey.
Otro siman lo tende
Hues lo dicta sentencia riba 21 di april venidero den ora di mainta. Ta spera cu e siman aki ainda lo tuma un decision cu si por transmiti e sentencia of no. Den caso positivo, lo tin camara solamente riba e hues ora e ta lesa e sentencia, pues no riba e sospechosonan sinta eyden. Asina mes e defensa di Kevin y Yowalvre a protesta y ta prefera pa pueblo no scucha e sentencia for di den corte.
