Gobierno di Aruba por medio di Minister di Finansa, Xiomara Ruiz-Maduro, no a duna suficiente oido na e consehonan brinda dor di e College Aruba Financieel Toezicht (CAFT) di dia 11 di mei ultimo. Ayera nan a haya un carta den cual CAFT a duna Gabinete Wever-Croes te otro siman dia 14 di juni 2018 pa ehecuta e consehonan brinda na nan, den un esfuerso pa evita un “aanwijzing” for di Conseho di Minister di Reino Hulandes.
Un di e disputanan entre CAFT y Gobierno di Aruba ta cu si Refineria di Aruba N.V. ta den posicion pa paga 10 miyon dollar na dividend den e dianan nos dilanti. Gobierno ta bisa cu si, pero CAFT tin duda, teniendo na cuenta cu na aña 2017 caba e mesun compania aki no a cumpli cabalmente cu su obligacionnan pa pasa ganashi pa su doño, esta Gobierno di Aruba.
E di dos disputa ta relaciona cu e asunto di gasto di salario na ambtenaarnan, cu na tur ta suma 379 miyon florin. No ta di awor, tambe tempo di Gabinete Mike Eman, cu CAFT a subraya cu mester baha e gasto aki drasticamente. Pero, e aña aki, e Gobierno nobo a haci net lo contrario, a AUMENTA e presupuesto di salario pa empleadonan cu 9 miyon florin! Nan a conseha Gobierno, cu un tono hopi skerpi, pa baha e cantidad di trahadonan. Parce cu e Gobierno nobo a tuma un cantidad di empleadonan nobo na trabou, den algun caso sin vacatura mes, por ehempel na DVG, unda e Minister a manda 15 trahado nobo! Den e area social tambe a tuma cantidad di trahado nobo, bou di e pretexto cu tin un “crisis social” y como tal mester tuma mas hende na trabou.
Mester menciona cu Minister Xiomara Ruiz-Maduro a reacciona mesora riba e carta aki y a lamenta cu nan tin apenas 7 luna na trabou y ya caba CAFT ta poniendo tanto presion. Contrario na e tono di acusa CAFT di e situacion financiero manera sa haci den pasado, awe cu un “toontje lager” a haci un apelacion pa mas comprension y pa CAFT duna Aruba mas espacio y mas tempo. E no por imagina cu CAFT lo para riba su punto y laga Conseho di Minister di Reino duna Aruba un “aanwijzing”. Esey lo por desemboca den un prohibicion pa fia placa, cu lo haci cu Aruba no lo por cumpli cu su debenan mas, specialmente esunnan internacional, cu tardi of trempan, lo bati na porta di e mesun Hulanda. Ta pesey e Minister di Aruba no por imagina cu Hulanda lo cana e caminda ey, pasobra na final ta nan mes lo mester “deal” cu e problema.
Mester menciona cu ta e mesun actitud aki di CAFT den pasado a conduci na un disputa formal entre Gobierno di Aruba y di Hulanda. E tempo ey Minister Presidente Mike Eman a agota di tur opcion y a opta pa drenta un welga di hamber. E tempo ey e mesun MEP a hari e actitud aki, e mesun actitud di Hulanda cu awe nan mester atende y coriendo risico di yega na un “shutdown” financiero di Gobierno di Aruba, den caso cu Gobierno di Hulanda obstaculisa fiamento di placa internacionalmente debi cu no ta di acuerdo cu Presupuesto 2018 di Gobierno di Aruba.
E tono di e carta di CAFT na Minister Ruiz ta cla y raspa, bisando cu nan tin 1 siman pa contesta y cu a base di e contesta ricibi, cu CAFT lo duna un conseho positivo of negativo pa traha den Conseho di Minister di Reino.
