E companianan di seguro di Aruba, afilia na Insurance Association Aruba, a reuni e siman aki cu Minister Xiomara Ruiz-Maduro relaciona cu e ultimo desaroyonan rond di introduccion di un impuesto nobo, esta e BAVP cu ta bay hunto cu BBO y BAZV. Den forma acumulativo, e impuesto indirect aki a subi di 3,5% pa 6% entrante dia 1 di juli 2018.
Den e reunion cu Gobierno, den cual SIAD tambe a compaña e mandatario, a repasa e ley y su implicacion pa e companianan di seguro, cu antes tabata exonera for di e cobransa aki. A informa Gobierno cu lo no por absorba e gasto aki, debi cu ya caba seguronan ta absorbando hopi gasto den nan seccion di “claims” y lo mester absorba mas ainda awor cu prijs di auto, piesa y material di construccion lo aumenta drasticamente debi na e impuesto aki.
Asina mes a keda di tene un otro reunion otro siman cu SIAD, pa mira si por tin opcionnan pa evita e exoneracion aki, cu ta aplicabel desde 1 di juli tambe pa e sector financiero, bancario y di seguro.
Mester tene na cuenta cu seguro di auto WA ta obligatorio, pues Gobierno den cierto forma ta obligando e comunidad paga mas, pa un seguro cu nan no tin e opcion pa nenga pa nan auto.
