Den un carta fecha ayera diabierna dia 5 di october 2018 dor di Algemeen Pensioenfonds Aruba (APFA) dirigi na empleadonan di Serlimar, a informa nan cu entrante otro luna nan no ta sigura mas. E decision drastico di APFA tin di haber cu e hecho cu Serlimar tin mas cu 3 luna sin manda placa di e trahadonan pa APFA. E carta a yega na adres di e trahadonan awe diasabra.
Serlimar mes no a sali afo ainda pa splica kico ta pasando y dicon no a aporta na fondo di pensioen pa e trahadonan.
Lider politico di UPP, Drs. Booshi Wever a lansa e carta aki riba su pagina di Facebook. El a skirbi acerca cu “Ata aki. Esaki ta e carta cu empleadonan di Serlimar a caba di haya. Serlimar tin mas di 90 dia sin deposita placa cu ta wordo kita for di e empleadonan den e fondo di pensioen di APFA. Ki smoesje lo bin cune awor? Kico e spindoctor lo bin awor cune? Ta pa motibo di secura y calor no a deposita? Of mester a paga sponsornan prome? Mester a paga e huur di e edificio na Pos Chikito, mester a paga un otro sponsor pa e huurmento di equipment of mester a paga pa e leasemento di truck cu bidding ge-fixed, pesey no a resta placa? Mientras e STEMPELPARLAMENT ta cu vakantie, e empleadonan di Serlimar ta sufriendo. Unda e sindicatonan balente a keda?”
Na Januari 1988 a inaugura Servicio di Limpiesa di Aruba (Serlimar) oficialmente como un departamento di Gobierno. Prome cu esey, servicio di limpiesa tabata resorta bou di Dienst Openbare Werken (DOW) y ehecuta dor di Reinigingsdienst. Algun di e empleadonan ey ainda ta den servicio! E compania ta ofrece servicio di piki sushi domestico na por lo menos 90% di tur cas na Aruba.
Na aña 2005 Serlimar a haya e status di un compania di Gobierno pero “sui generis”, cu ta dun’e mas espacio pa maniobra y tuma decisionnan sin ta mara mucho di cerca di Gobierno. Naña 2007 a cumpra 36 mil bari di sushi moderno cu a parti na tur cas di Aruba. Na aña 2015 a introduci tarifa residencial pa recogemento di sushi domestico, fiha na 25 florin pa luna. Masha poco hende a paga, debi cu sindicatonan, specialmente FTA, a urgi pueblo pa NO paga pa recogemento di sushi. Awo na 2018 e mesun tarifa ta riba mesa atrobe, cla pa ehecuta awor na Januari 2019.
Serlimar ta maneha e dump na Parkietenbos, 16 hectar di sushi, cu segun e trahadonan, ta crece cu 3.3 meter di haltura tur aña pa e ultimo 15 añanan. Serlimar ta conta cu 189 empleado, 17 truck di sushi y a bisa di ta bishita 40 mil cas tur siman pa recoge desperdicio domestico.
