Manera cu AHATA a avisa di trempan y mescos Mediado di Gobierno a alerta comunidad, cu si e pandemia dura largo, cu algun casino lo cera nan portanan. E prome cu a avisa di lo no habri mas ta Eagle Aruba Casino, unda antes tabata Trop Casino. E casino a comunica esaki caba na tur trahado, pero awo nan sindicato FTA, ta na mesa pa mira na ki miho areglo por yega pa e trahadonan.
E casino ta conta cu mas of menos 60 trahado, cu for di luna di maart 2020 cu e pandemia a yega Aruba, ta na cas cobrando via subsidio di salario di SVb. Pero, pa e casino por opera normalmente, e mester di un cantidad di huesped pa drenta tur dia y gasta un suma di placa. Mirando e nivel abou di ocupacion na e hotel den cual nan ta situa y mas ainda, e ocupacion abou general na Aruba y e pronosticonan pa e siguiente lunanan, cu gerencia di e casino a opta pa lag’e cera permanentemente.
Bisando esey, a ofrece e trahadonan un pakete di retiro cu ta contene nan cesantia cu nan tin derecho riba dje, dependiendo e cantidad di añanan cu ta trahando pa e compania. Entre 10 pa 15 trahado por haya un trabou permanente den e hotel mes, pasobra den e casino nan tin algun waiter y personal di restaurant cu facilmente por pasa di un trabou pa e otro.
E sindicato awor ta bogando pa drecha e pakete, pero mas cu esey, ta opta pa mas tanto trahado posibel por haya un sorto di transferencia for di e casino pa e hotel. Esey lo no ta facil pasobra e hotel tambe ta pasando den momentonan dificil debi na un caida drastico di reservacionnan. Durante e siguiente dianan lo sigui na mesa cu gerencia di e casino, pa FTA mira si toch por logra un pakete poco mas lucrativo pa e trahadonan cu ta keda riba caya.
