Despues di dos dia cera, di acuerdo cu nos Codigo di Procedimiento Penal, fiscal por ordena pa prolonga detencion di un sospechoso cu ocho dia mas. Esey a sosode tambe diaranson ultimo, den caso di e chauffeur cu tabata envolvi den e desgracia fatal di dialuna marduga na Savaneta.
Husticia ta investigando e caso pero tur cos ta mustra cu lo persigui e hoben di apenas 23 aña pa a causa un accidente fatal den trafico, siendo burachi y sin tin un permiso legal (rijbewijs) pa por stuur un vehiculo di motor. Riba esaki tin mas di cuater aña di castigo, locual probablemente lo nifica cu e hoben lo keda cera den KIA te dia su caso bin padilanti.
No kier a supla
Durante un prome instante, na e sitio di accidente, e chauffeur a nenga di supla pa midi e nivel di alcohol den su rosea. Sinembargo, despues cu el a yega ward’i polis y a splic’e e consecuencianan di su decision pa no supla, el a opta pa toch coopera. A mustr’e riba e echo cu si e no supla, cu fiscal lo impone e castigo maximo p’e, di acuerdo cu nos codigo penal. Door di supla lo haya e nivel exacto di alcohol den su sistema, cu lo por “yud’e” ora di stipula un castigo p’e. A dura e sospechoso basta rato prome cu el a absorba e conseho di polis y a dicidi di supla na ward’i polis. Obviamente e test a sali malo p’e, indicando cu e tabata burachi tras di stuur.
Chauffeur sin rijbewijs
Pero e tin mas problema. A bin resulta cu e no tin rijbewijs tampoco, pues cu de facto, e no mag ta tras di stuur mes! Cu esey, e sospechoso awo ta hay’e confronta cu e peso di ley contra dje, pasobra door di su mal comportacion den trafico, el a kita bida di un otro hoben. Ta cuestiona su comportacion pasobra imagennan di varios camara di siguridad den e area ta indica bon cla cu e motorcycle no tabata bin duro pero e si tabata pustando cu un otro auto. E dos autonan, parce ambos ta di marca Nissan modelo March, a pasa un truck di sushi y a bal dal e brommer frontal riba su mesun banda di caminda.
Di dos morto den trafico
E desgracia entre un auto y brommer a tuma luga dialuna dia 18 di maart pa 4:40 am na altura di e oficina di Nagico na Savaneta. Pa 5:30 am dokter Texier a constata morto di e hoben Maximilian Thomas A. Hernandez Pinedo, naci na Aruba dia 4 di april 2003, pues tin apenas 20 aña di edad. Ta sospecha cu e auto marca Nissan modelo March, color blauw, numera A-50141, tabata bayendo direcion pariba y tabata pasando un truck di sushi cu velocidad halto y a bay den frontal den e brommer marca Suzuki, numera MFA-2664, cu tabata biniendo direccion pabao. Tabatin cuater persona den e auto y tur a ricibi atencion medico na e sitio mes.
Sospechoso a bira malo den cel
Diaranson ultimo a manda ambulance pa ward’i polis di Santa Cruz pa un preso. A bin resulta cu ta e hoben sospechoso di accidente fatal. Parce cu e no ta comiendo bon y a hiperventila. Cu ambulance a hib’e hospital, bou custodia di polis, pa ricibi tratamento medico. Despues cu el a mehora, a trec’e bek den su cel. A nota si cu e no por maneha e situacion bon y pa evita cualkier situacion di lamenta, a opta pa cuminsa canalisa e caminda pa hib’e cera na KIA mesora.
Seguro no ta paga
E echo cu ta un chauffeur sin rijbewijs y riba dje burachi tabata stuur e auto, ta pone cu automaticamente seguro no ta cubri e daño haci. Esey ta un sla duro pa famia di e defunto, cu awor mester cubri tur gasto di entiero nan mes y drecha e motorcycle. Claro cu durante tratamento di e caso den corte lo bin e demanda civil pa e daño material cu a keda atras. Mirando cu pareha di e victima ta na estado y si por demostra cu e defunto ta “kostwinner” pa e yiu, lo por haya tambe peticion pa cria e yiu te na edad di adulto. Ta tur e tipo di demanda nan asina por haya den corte, aunke cu ta keda na un hues pa honra e demanda of no.
