Dialuna mainta trempan a bati alarma pa un caso unda a haya un persona cu no ta duna señal di bida na un cas na Boegoeroei. A manda ambulance y polis pa e sitio, cu ta Boegoeroei 22-D.
Ora cu a yega, a constata cu ta trata di un compleho di apartamento, cu ta keda riba e caminda pa bay Imeldahof, drentando un hanchi pa bay aden na banda drechi. Informacion cu a haya na e sitio ta cu momento cu e habitantenan di compleho a lanta mainta, un di nan a topa cu un homber den pool ta flota. E tabata cu su paña bisti, pero no tabata reacciona riba e gritonan pa cual a dicidi di bati alarma.
A yama dokter forensico na e sitio y a constata cu e homber a fayece. Parce ta un turista Colombiano di 50 aña di edad. Tur autoridad concerni a bay na e sitio y despues cu a caba cu investigacion tecnico, a saca e curpa for di e pool pa transport’e pa funeraria.
Na su famia y conocinan ta bay palabra di condolencia.
