Diadomingo anochi polis a presenta na un cas na Wayaca p’un caso serio. Aki ta caminda cu un homber a hinca su mes varios biaha den pecho y tabata sangra basta. Ta suficiente motibo pa polis pidi ambulance cu urgencia n’e sitio.
Mirando cu e post di ambulance no ta mucho leu di e cas, a yega den un tempo record n’e sitio di incidente. A traha basta cu e victima na sitio pa djey transporte cu maximo urgencia pa hospital. Na hospital e situacion a bira poco tenso, mirando cu personanan a cuminsa lanta cu miembro di siguridad di hospital. Na prome instante e victima tabata stabiel, pero pocopoco su situacion a deteora y pa den oranan di marduga, e team di cuido no por a haci nada mas p’e.
Ta trata di Roshan Wernet, kende no mucho rato prome cu el a bay cas, e tabata riba veld y tabata hunga softball. Comosifuera poco, e tabata den e team victorioso tambe, esta CEA. CEA a hunga contra KPA y a gana nan 13-5. Recherche tin e caso y ta investigando kico exactamente a sosode.
Pa awo, Headlines Group kende ta e cas editorial di 24ora.com y TREMPAN ta desea famia hopi forsa den e momentonan dificil aki.
