Diahuebs anochi a tuma luga apertura di e obra di luna, Vier Vrouwen (Vrouwen in verwachting) di e artista Adi Martis, den e lobby di Cas di Cultura.
Ray-Ann Hernandez, director di Unoca, a splica loke a haci ta apertura di e programa obra di luna. Esaki ta un programa cu durante un curso di algun luna, ta bay presenta un obra cada luna, pa pone e obra den un highlight.
E obranan aki ta forma parti di e coleccion di Sticusa, cu ta un coleccion cu Aruba a hereda na final di añanan 80, na principio di añanan 90 for di Stichting voor culturele samenwerking di Hulanda. Despues di basta tempo e a saca e obranan aki fo’i magazijm y restora. Ta den un programa pa trece e obranan p’adilanti, no solamente pa hende wak, pero di parti di e artista kier trece dilanti ken e ta y tambe un analisis di cada obra cu tin den e coleccion di Sticusa.
E coleccion aki ta importante pa pais Aruba, pasobra e ta considera como patrimonio nacional. Pero cera den un magazijn ningun hende no ta wak e. Ningun hende por apreci’e. Cu e programa aki kier cuminsa duna educacion tocante e obranan pa na final, ora cu tur e obranan a haya nan lunanan exponi, por haci un exposicion grandi, unda tur hende por admira y aprecia cada obra riba nan mes, un biaha mas.
