Den fin di siman 24ora.com a haya contacto cu par di studiante di sectornan di Universidad di Aruba cu a vocifera nan preocupacion cu nan facultad tin plania di sigui normal cu lesnan e siman aki, sin cu e studiantenan tin CP, SO of Examen. Por corda cu Crisis Team siman pasa a anuncia cu lo cera scolnan pa dos siman, cu excepcion di e klasnan cu tin CP, SO of Examen por sigui haya les.
Pero e problema no ta data di awo cu Crisis Team a tuma e decision. Ya caba e universidad no tabata mantene su mes na reglanan y Protocol di DVG, principalmente pa loke ta distanciamento social. Ta duna les den un area chikito y cu 25 studiante. No ta papia aki di muchanan di 5 pa 15 aña di edad, pero adultonan di 20 pa 35 aña.
Diadomingo mainta e profesor a informa e studiantenan cu lesnan lo sigui normal riba dialuna 29 di maart! Studiantenan a email dean y pero no a logra haya niun informacion. O sea nan no ta haya reaccion, mientras cu nan mes a constata cu si e tabata contesta otro profesornan.
Mirando e situacion, dialuna par di studiante a busca informacion cerca polis, cu a informa e studiantenan cu no por tin les, solamente e docentenan tin mag! Pero e decano di facultad FHTMS ta keda man duro y ta bisa cu nan ta djis sigui reglanan di DVG y protocolnan di minister!
Pero den oranan di mainta 12 studiante a dicidi di protesta kedando cas, pa cual e decano a rabia y a splica e studiantenan cu e universidad ta cay bou categoria di scol, menciona door di gobierno y Crisis Team.
Studiantenan a tuma contacto cu director di BRA Rino Hermans kende a aclaria pa nan cu universidad si ta conta como un scol. E studiantenan a hasta manda potret pa DVG y informa cu tin mas studiante cu no a sali den e potret pero tampoco a haya reaccion. Esaki a laga e studiantenan perde speransa. E grupo di studiante sa cu si nan bin dilanti contra Universidad di Aruba, e por afecta nan academicamente.
Unico cos cu e studiantenan ta pidi ta pa UA respeta nan salud y bienestar.
24ora a tuma contacto cu decano di FHTMS, John Wardlaw kende a splica cu keto bay ta duna les. Esaki ta e instruccion cu nan a haya for di diabierna caba for di College van Curatoren y Rectorado di UA. E Universidad ta atende cu tur protocol di DVG y hamas a ignora esakinan. Nan ta lamenta cu studiantenan ta vocifera nan mes di e manera aki mirando cu nan ta duna nan tur facilidad pa si encaso no por atende e les, tin e posibilidad, avisando di antemano, por sigui lesnan virtualmente (zoom).
Tambe 24ora.com tambe a contacto cu BRA, Sr. Hermans, kende a bisa cu e situacion aki tin su atencion.
