Ayera caba Polis a bay Club Arias na Savaneta pa atende un problema di huur entre e doño di e compleho di apartamento y un huurdo. Polis a pensa di a yega na un acuerdo entre e partidonan, pero awe e problemanan a sigui, pa cual merdia pa 2:00pm a detene e doño di e apartamento, sospecha di ladronicia.
Tur cos ta mustra cu ayera e doño di e apartamento a saca un huurdo afo. Den e proceso el a saca tur su pertenencianan afo y laga nan pafo di e apartamento, wardando yegada di e huurdo pa e pikinan y bandona e sitio. Ora e huurdo a yega pa piki su pertencianan, el a sinti falta di un tas cu placa. El a yama Polis pa keha di e ladronicia aki, pa cual a yama e doño y a acorda cu awe e lo topa e huurdo cu e tas y placa di dje.
Awe sinembargo ora a topa atrobe, e doño di e apartamento a yega sin e tas y sin e placa di e huurdo. Consecuentemente a yama Polis atrobe cu a dicidi di detene e doño acusa di ladronicia. A transport’e pa Warda di Polis na San Nicolas pa present’e dilanti un Fiscal Auxiliar pa e duna cuenta di su acto.
