Diabierna ultimo, Prome Minister Evelyn Wever-Croes hunto cu Minister di Finansas Xiomara Maduro a reuni cu representantenan di CAft, cu tabata na Aruba pa busca algun informacion y pa trece algun tema dilanti. Prome Minister a indica cu durante e reunion, CAft a elogia Gobierno riba varios punto y a trece dilanti e puntonan cu mester mas atencion.
Gobierno a ricibi elogio pa termina e presupuesto 2024 na tempo y cu awor ta den proceso pa entrega door di Minister di Finasas, pa dia 1 di september, manera prescribi den ley, tambe pa e surplus cu tin den e presupuesto, entradanan cu ta bayendo bon, y pa e cuadro di diferente aña cu ta inlcui.
Otro tema cu Prome Minister a trece dilanti, ta e cambio di ley di supervision, e Laft, cu ta un cambio di ley cu Gobierno a traha, na unda ta bay inclui e normanan nobo y cu pronto lo entrega esaki na Parlamento.
Prome Minister a splica cu lo tin tres norma nobo den e ley. E prome ta e norma presupuestario, cu ta indica cu mester tin 1% di surplus cada aña. Esaki ya caba gobierno ta cumpliendo cu ne cabalmente. E di dos ta e ‘personeelslasten norm’, cu ta e gastonan di personal cu mester yega na nivel di 10% di e GDP maximo pa 2027. Esaki ta nifica cu e gastonan di personal, no por surpasa 10% di e gastonan di GDP. E norma aki ta conta pa mayoria di pais den region. Aworaki, Aruba ta na 11% cu ta haci cu facilmente lo yega na e 10% aki pa 2027. E di tres norma ta e “schuldenlasten norm” cu ta e debe di pais Aruba. Pa cu e di tres norma, tin un palabracion cu e debe nacional mester baha na 70% pa 2031 y na 50% pa 2040. Por conclui cu esaki ta bayendo bon, mirando cu IMF a indica den su ultimo rapport cu Aruba lo alcansa e 70% na 2028, cu ta 3 aña prome cu e plabracion haci.
Premier Wever-Croes a indica cu e reunion a bay den bon ambiente y masha positvo. E representantenan lo regresa Aruba na october, na unda lo reuni un biaha mas riba e desaroyonan andando.