Recientemente Gabinete Wever-Croes II, representa pa Prome Minister mr. Evelyn Wever-Croes y Minister Dangui Oduber, a reuni cu Embahador di India na Hulanda, Reenat Sandhu y Consul Honorario di India na Aruba, sr. Gupta.
E reunion tabata mas bien pa explora e oportunidadnan cu India ta brinda y cu lo kier mira mas cooperacion cu Aruba. Specialmente pa cu remedi, innovacion y energia.
Minister Dangui Oduber a consider’e un bon reunion, cu hopi oportunidad pa Aruba, specialmente riba tereno medico.
Reenat Sandhu, di 59 aña di edad, ta e representante diplomatico di India pa Reino Hulandes. Prome cu esey e tabata Embahador di India na Italia. E ta casa cu e Embahador di India na Merca. E ta mama di dos yiu. El a studia economia na Delhi School of Economics. Tabata su prome bishita na Aruba.
