Siman pasa diamars y diaranson un boto di patruya Metal Shark di e punto di sosten di Wardacosta na Aruba, den colaboracion cu e unidadnan di e avionnan di Wardacosta, a detene dos boto, durante cual un total di casi 500 kg contrabanda a keda confisca. Dos Colombiano, un Venezolano, y dos Arubiano a keda detene den e caso aki. E droga y e sospechosonan a keda entrega na e Unidad contra Crimen Organisa di Cuerpo Policial di Aruba, cu ta sigui cu investigacion di e casonan.
Ayera Zr.Ms. Groningen, cual ta nabegando pa Wardacosta Caribe Hulandes, a bolbe interecepta un transporte di droga. Esaki a keda haci pa medio di coordinacion di e Centro di Operacion Maritimo (MOC) en cooperacion cu e helicopter y avion di Wardacosta. Durante e accion aki mas cu 1000 kg di contrabanda a keda confisca y a detene cinco Venezolano. E contrabanda y e sospechosonan a keda entrega na Cuerpo Polisial di Corsou, cu lo sigui cu demas investigacion.
Cu e ultimo accion aki, e conteo di e casonan di Wardacosta a yega na seis den un lapso di tres siman. E total cantidad di peso di e contrabanda cu a confisca durante e seis accionnan aki ta yega na casi 4000 kilo. E lucha contra traficacion di droga ta sosode den bon cooperacion cu Wardacosta su partnernan local den cadena hudicial, manera e diferente cuerponan policial di Corsou y Aruba, BOT K-9 di KIA, Guarda nos Costa, Duana y Servicio di Imigracion.