Lider di UPP Booshi Wever den un declaracion a denuncia nombramento di algun persona cu un contracto basta largo. El a cuestiona si esaki ta loke ex minister Marisol Lopez Tromp a bisa ta un un ambiente laboral no mucho agradabel.
E politico a haya den su box algun documento cu ta relaciona cu e ministerio di Dangui Oduber. Por a lesa di nombramentonan cu e politico ta cuestiona pa motibo cu esakinan a sosode durante pleno pandemia, unda cu ta papia cu mester baha gastonan, a pone sindicatonan entrega, pa bin nota awo e seis nombramentonan aki cu ta di e oficina di minister Dangui Oduber. “Con bin diripiente tur e nombramentonan aki,” Wever ta puntra.
E tabata enfatico den su ponencianan cu transporte di pashent ta algo di AZV. E organisacion aki a bini pa motibo cu antes no tabatin un bisti di tur esnan cu ta brinda servicio na gobierno, no tabatin un bista di e gastonan real cu tin den salubridad publico y na cuido. A bin cu AZV pa purba reglamenta esaki.
Loke e ta haya peculiar ta cu diripiente, despues cu e ex director a prolonga un contract e mester a bay y e personanan aki a cuminsa haci e trabou pa AZV. E ta puntra di con ta saca un tarea di AZV y pone den man di otro hende. Pero tambe e kier sa si no tin dobel pago, tanto na esun cu tin e contract como na e grupo di seis persona nombra pa haci e transporte.
Den e papelnan cu el a haya tambe cu ta un lista di decisionnan tuma, ta nombramento di un señora den un vacatura cu tabatin habri na DVG (Ouderenzorg) cu no sa nada di e sector. A tuma e decision aki mientras cu a bypass un persona cu a solicita pa e puesto y kende semper a haci e trabou ey. Tambe a nombra un hefe di PZ, kende ta ruman di un abogado cu antes tabata brinda servicio na Otmar Oduber y awo ta traha cu Dangui Oduber.
Tur e nombramentonan aki ta haci pa cinco aña mientras cu e regla ta cu tur hende cu bini cu e minister ta bay bek cu nan.