Prome cu CP-week a cuminsa cincuenta hoben di Colegio San Antonio, tur di nan den Ciclo Avansa 1, a haya e oportunidad di participa na e Inspiratie Tour di Stichting Ja Ik Aruba!
Di e hobennan cu a wordo scogi, a tene cuenta cu entre otro cualidad di liderazgo, organisacion, creatividad, perseverancia, trabou comunitario y dedicacion. No semper e hoben scogi ta conciente cu e tin e cualidadnan aki. Den hopi caso nan ta cualidad cu e docente ta mira den e alumno y ta wak tambe cu e tin e potencial pa desaroya esaki.
Stichting Ja Ik Aruba! bou liderazgo di Jalken Antonio tin como meta pa prepara e hoben pa e sociedad cu ta sper’e asina cu e caba su scol. Señor Antonio, cu ta draai un programa similar na Hulanda, a realisa cu hopi biaha e perspectiva di e hoben na Hulanda y tambe aki na Aruba, no ta cuadra cu loke mercado laboral ta spera di dje specialmente pa loke ta trata e actitud corecto pa por funciona como profesional. E intencion di e fundacion ta pa trece e hoben mas cerca di e realidad di mercado laboral mediante un asina yama Inspiratie Tour. Durante di e tour aki un grupo di hoben a bishita WEB Aruba N.V. y e otro grupo a bishita ATA na San Nicolas. E idea tawata pa laga e alumno participa na e procesonan cu ta tuma lugar den un compania diariamente. Haciendo esaki, e hoben por compronde un poco mas di e actitud cu e mester tin pa triumfa riba mercado laboral na Aruba.
Na final di cada tour e alumnonan ta haya un problema pa soluciona y mester presenta nan ideanan na e management di e organizacion. Di e forma aki, e alumno ta siña busca un solucion creativo pa e problema, ta prepara un presentacion pa management di e compania y despues di presenta esaki lo haya tip y consecuentemente por sinti su mes balora door di personanan clave den e compania.
E intencion di e programa aki cu yama “From good to great” ta pa selecciona un total di 10 alumno cu a sobresali durante di e Inspiratie Tour y sigui traha cu nan e aña escolar nos dilanti. Di e forma aki, nan lo sigui un programa adapta y lo tin e oportunidad di wak den “cushina” di companianan grandi riba nos isla. E meta final ta pa logra un cambio den pensamento di e hoben y dune tur herment cu e por uza den futuro.
