DVG: Informa bo mes bon prome cu bo bay biaha

Vakantie ta den porta y na Aruba hopi hende ta biaha den famia bay sea ta pa Europa, Merca, Latino America of cualkier otro pais, Departamento di Salud Publico (DVG) tin algun tips cu ta yudabo prepara bo mes bon prome cu bo subi avion of barco.

Jurette Croes, di DVG, a splica cu ta hopi importante cu ora bo bay di biahe, tuma tempo prome pa haya sa unda bo ta bay y kico ta e factor di riesgo cu por tin influencia riba bo salud den exterior. E ora ey bo por proteha bo mes for di aki si ta posibel y haya tipnan valioso pa bo proteha bo salud.

Ronald Geerman di e seccion di malesanan infeccioso, a splica cu ta hopi importante ora bo scoge un luga pa biaha, haci un research prome di e luga, wak kico ta e factornan di riesgo cu tin na e luga y tambe por tuma contacto cu e Departamento di Malesanan Contagioso via telefon y por dunabo algun informacion adicional encuanto e pais en particular cu bo ta bay.
Mester pone enfasis cu no ta solamente e vacuna di keintura geel ta importante pa un persona tin esey tuma caba ora e ta cla pa bay. Tin diferente factor tambe cu mester tene cuenta cun’e, cu no ta solamente malesa, cu bo por evita door di vacuna.
Si wak rond mundo, tin malesanan cu ta wordo transmiti door di sangura y tambe malesanan cu ta wordo transmiti door di cuminda. Esey por evita door di practica higiena, esta laba man bon y tambe kies unda bo ta bay come.
Es decir no come riba caya, no purba cosnan straño riba caminda, pero tene extra cuenta cu e factor unda bo ta come. Tambe tin e factor manera sangura, cu ta consehabel bo yama e Departamento di Malesanan Contagioso of bo por haci bo investigacion, of tambe bo por biaha cu bo repelente y evita esey. Tambe tin e factor di personanan cu tin malesanan cronico manera diabetes, presion halto, etc. corda di bay cu suficiente medicamento y evita cu ora bo ta den exterior y ripara cu remedi a caba cu bo.
Tambe ta importante hendenan cu ta gusta animal tene cuenta cu algun aspecto. Por ehempel ta wak un cacho bunita riba caya, ta pasa man riba dje, ate cacho a mordebo. Ban evita e cosnan aki. Y si toch pasa cu bo wordo mordi pa un cacho, pushi, macaco etc. den un ke otro luga exotico, tuma contacto cu dokternan na dicho pais. Nan conoce nan pais mas miho. Nan por dunabo miho recomendacion kico pa haci. Esey ta den caso cu bo wordo mordi. WHO periodicamente ta pone un update di enfermedadnan cu tin na cierto paisnan. Pero si tin cierto malesanan cu ta creciendo na e momentonan aki, ta te despues di algun tempo WHO ta update loke e tin. P’esey preferiblemente si algo pasabo na e luga, tuma contacto cu e dokternan di dicho pais. Nan tin mas informacion.
Por bisa awor aki e caso ta X, pero ya caba pa mañan e por cambia. P’esey ta importante pa tuma contacto cu Departamento di Malesanan Contagioso, p’asina haci un investigacion con e situacion ta na e pais pa unda bo ta biaha.

Segun dr. Wilmer Salazar, ora cu un persona tin pensa pa bishita un pais, sea un pais den nos region of den otro region, mester tuma cierto medidanan. Una bes cu e persona a dicidi di bay, e mester tene na cuenta cua ta e luganan cu nan lo bay bishita y ki sorto di turismo nan lo bay haci den e region eynan. Tin diferente malesa, tin diferente forma di transmision y tin diferente potencial di gravedad entre nan. Si un persona of un grupo di persona, of un famia ta bishita cierto regionnan, por fabor lesa bon kico nan tin. Si mester di vacuna, acudi na Departamento di Malesanan Contagioso, kendenan tin tur conocimento pa conseha cua vacuna ta preferibel pa e parti aki. Ademas di keintura geel, como ya e ta activo y medidanan basico manera higiena, laba man. Si bo a come fruta of berdura, laba nan bon. Mantene bo higiena respiratorio tambe bon. Ora bo niester of haya algun malesa respiratorio, acudi na bo dokter. Importante ta pa cera un seguro di biahe. E ta scapabo di cierto situacionnan no deseabel y por lo menos disfruta bo vakantie manera debe ser, den un forma sano, den un forma cu bo no ta haya complicacion ora cu bo bin bek Aruba.

Esakinan ta algun tips valioso cu na momento bo bay di biahe, por preveni pa bo por haya cualkier enfermedad den exterior.