Siman pasa Warda nos Costa, obviamente riba tip, a yega durante entrenamento di gymnastiek di e organisacion Gymnastics Aruba CGA Avanse y a bay cu e coach Eliana di Venezuela, cu no por a mustra un permiso valido ni di trabou ni di estadia. E organisacion tin mas o menos 300 mucha ta train semanalmente cu e juffrouw aki cu ta cualifica pa e trabou, pero cu ta ilegal na Aruba. E club a hiba un cantidad di e muchanan para dilanti edificio di Gobierno cu pancarta “#JusticeforEliana” pa pone presion riba e Ministernan pa laga e coach liber, kende te cu diasabra tabata deteni na Warda nos Costa pendiente su deportacion. Sinembargo, diasabra Minister Andin Bikker a desvia for di su maneho y a haci un excepcion pa duna e coach ilegal un dispensacion pa ta na Aruba y asina regla su permiso di estadia y trabou pe.
Di turista pa coach
Desde aña pasa e coach aki ta na Aruba como turista. Na dado momento el a cuminsa train e muchanan na e scol di gimnasio, no ta mucho cla si e tabata cobra of no. Sinembargo, no a pidi permiso pe. Al contrario, a haci comosifuera e ta un turista y a pidi pa alarga su estadia di “turista” riba nos isla mientras cu e tabata train e muchanan. Na dado momento, ora cu su permiso di estadia como turista a vence, e ora a pidi un permiso di trabou pe pero su papelnan no tabata na ordo. El a apela e decision di negacion. E lo no ta un decision facil pasobra un di e rekisitonan pa pidi bo prome permiso di trabou ta, cu Bo mester ta den exterior sperando e permiso. Ta for di cuminsamento di aña e ta na Aruba, pues casi 11 luna awo, sin permiso, pues su status ta di un ilegal.
E rol di Warda nos Costa
Warda nos Costa como tal a actua corecto dor di detene y cuminsa regla e proceso di su deportacion. Mayornan a keha cu e forma con a bay cu e coach durante un entrenamento no ta profesional y por a haci’e na un otro forma. E problema den tipo di discusionnan asina ta cu cada ken ta mir’e di su mesun angulo, pasobra Warda nos Costa lo bisa cu si a regla su permiso pe, lo no tabatin detencion tampoco. Gobierno tabata consciente di e situacion y a compronde cu e señora no tin permiso pero mas cu tur cos, e organisacion pa kende e ta traha nunca a regla su permiso pe. Mester ta cla pa tur hende cu ora pidi permiso di estadia y trabou pa un stranhero no kiermen cu automaticamente e por cuminsa biba y traha na Aruba.
Muchanan a bay manifesta
Dor di e manifestacion di diabierna atardi cu e muchanan, Minister Glenbert Croes a duna su OK pa e persona por haya permiso sin mester pasa e trayecto na Departamento di Labor prome. El a haci esaki den comunicacion cu su colega di Deporte, Dangui Oduber, cu no tabatin problema tampoco pa yuda e club di gymnastiek legalisa nan entrenado. Cu e realidad aki riba mesa, Minister Andin Bikker di Husticia e ora a opta pa desvia di su mesun maneho anuncia, pa toch otorga e señora aki un dispensacion pa por ta na Aruba mientras e ta ilegal. Dor di e dispensacion aki, e ora si e ta cumpli cu e rekisitonan di permiso pa cual e lo haya su permiso di estadia y trabou pronto.
E organisacion lo haya multa?
E pregunta ta si Gymnastics Aruba CGA Avanse lo haya un multa awor pa a hinca e coach aki den un situacion asina incomodo. Con Gobierno lo haci pa haya tur su placa di impuesto cu no a paga e ultimo lunanan aki pa un persona cu a traha ilegal na Aruba y awor ta haya un permiso comosifuera nad’un pasa. Ta bisa cu el a traha pasobra Warda nos Costa a hay’e trahando, pero no ta conoci desde ki tempo y si a paga impuesto pe di Loonbelasting, AOV-AWW, AZV, SVb, Pensioen, etc. Lo spera awor riba decision di Warda nos Costa relaciona cu e rapport cu mester ehecuta pa yega na multa, pasobra si haci excepcion pa un, mester haci pa tur. Tur stranhero tin un motibo valido pa ta na Aruba, pa busca miho porvenir, etc. No mas cu den fin di siman a nota con autoridad a gara 5 cu a yega ilegal Aruba via lama y ta cla pa deporta nan. Kico nan ta diferente cu e coach di gymnastiek?
Nos ta legalisa ilegalnan of no?
E punto cu kier mustra aki ta cu na Aruba nos opinion sa varia lihe dependiendo ta ken ta e stranhero. Esun cu nos conoce ta bon pero esun di Bo ta malo y mester deport’e di Aruba. E realidad ta cu stranheronan ta formando parti di nos sociedad di hopi aña caba y ultimo tempo mas ainda. Si a nota cuanto mayor a bay para protesta dilanti Cocolishi pa legalisa un coach Venezolana ilegal, ta e mesun cu probablemente despues lo comenta cu mester saca otro Venezolanonan for di Aruba pasobra “no hay cama pa tanta gente”.
