“Awo ta papia di toque de queda cu ta cuminsa 10:00pm – 5:00am, pero mi ta haya cu ta mucho trempan pa hacie, sin pensa nan a hacie! E no ta husto pasobra nos empleadonan ta bay perde nos oranan asina anto loke e noticia ta cu tur Restaurantnan cu ta cay den hotel si tin permiso pa keda habri te 11:00pm”, asina Charleston Kelly, un empleado di AZIA Restaurant, a manda nos como su opinion.
“Anto nos Restaurantnan cu ta pafo di hotel tin cu ta cera 9:00pm en punto pasobra asina e ley ta bisa awo. Mi no ta compronde pakico hende ta pensa asina y no uza nan tino! Ley pa un ley pa tur!”
Segun Charleston Kelly, turistanan a bin Aruba pa disfruta, pa gasta nan placa, pasa dushi y despues bay bek nan pais. Turistanan no a bin Aruba pa haya nan den un situacion manera awe.
“Pesey manera boso a mira tabatin un “walk out“ protesta di tur Restaurant den area di Noord contra e medida! Nos ta traha pa nos pan di cada dia. Turista a acerca nos y puntra pakico mester a bin cu toque de queda asina trempan. Nan mes a expresa cu it doesn’t make sense. Y ta berdad pasobra sin pensa nan kier core reintroduci toque de queda, mientras cu mi a verwacht cu ta ley seco of shelter in place lo a bin na vigor”, segun Kelly.
E ta sinti cu deliberadamente Gobierno a core cambi’e y reintroduci toque de queda for di 10:00pm pa 5:00am. “Mi kier sa si gobierno y su expertonan ta bon informa pasobra nos compania no por acepta e cos ki. Nos cu ta Arubianonan y stranheronan trahado, ta uni pasobra mester stop di manipula y haci hipocrita pasobra esey no ta bay soluciona e problema hamas”, segun Charleston Kelly di AZIA Restaurant.
Aruba ta den crisis, mientras cu tin diferente otro crisis bruha den otro. Pero ban cuminsa traha bon y informa corecto pa pueblo por sa miho y scucha di bon consehonan.
“Nos tin derecho y nos tin nos opinion. Nos ta ser humano y nos no ta djis coleganan. Nos ta famia di otro. Pasobra si e gobierno aki kier Hospitality & Tourism sigui draai nos economia, e ora no por impone medidanan cu ta afecta e trahadonan y huespednan. Mi ta considera esey un eror. Mi kier pa tur hende compronde bon, cu lo bay tin un di 2 manifestacion si sigui asina”, di acuerdo cu Charleston Kelly, empleado di AZIA Restaurant afecta pa medida di Gabinete Wever-Croes relaciona cu Toque de Queda awe.
