E ultimo 2 lunanan, e tri-atleta elite Arubano, Renze Postma tabata tin un calendario basta ocupa unda e la biaha pa Europa pa asina entrena y competi tanto na Hungria, Portugal y Hulanda.
Despues cu na juni ultimo, e la triunfa pa di 3 aña consecutivo den e Aruba Internacional Triathlon 2017, e atleta Arubano Renze Postma a biaha pa Europa y atende dos campo di entrenamento. E prome tabata na Budapest, Hungria hunto cu e seleccion nacional di triathlon di Hungria mientras e di dos tabata na Rio Maior, Portugal. Tambe Renze a competi den e mundial di triathlon na Hungria mientras diabierna awor dia 15 di september e lo finalisa e competencia di federacion mundial di triathlon esta ITU ora e competi den e U23 Men World Championship na Rotterdam, Hulanda. Mester bisa cu Renze ta den e miho forma cu nunca unda e la mehora su tempo considerabelmente y a mustra un progreso enorme den su deporte. E aña aki so Renze a permanece varios luna den exterior unda e la sigui un entrenamento intensivo na Colombia pa despues competi den e Camtri Series cu a inicia na Salinas, Ecuador. Aki Renze Postma a sobresali y obtene un tremendo resultado kibrando su record personal cu casi 4 minuut. Na luna di mei, Renze Postma ta gana e prome lugar overall den e Curacao Triathlon International 2017. Na Hulanda, e atleta Renze Postma ta wordo guia pa coach Nicolaas Robert. E evento di e federacion mundial di triatlon, ITU ta esun di mas grandi na mundo mirando e cantidad grandi di tri-atleta rond mundo cu lo participa na e evento den e categorianan di elite, sprint, junior, U-23, Paratriatlon y aquathlon. Durante cuater dia largo e miho tri-atletanan rond mundo lo lucha pa e titulonan maximo di triatlon den e awanan di Rotterdam. Un danki sigur na Lotto, e Loteria di Aruba pa medio di Comision di Subsidio cu a subsidia e competencia di e tri-atleta Renze Postma pa e ITU U23 Men World Championship na Rotterdam, Hulanda. Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.
