MEO a lansa e trayekto di komunikashon den kuadro di Kòrsou su Plan Nashonal di Desaroyo ku un kampaña interaktivo pa hoben. Tur hóben entre 15 i 18 aña di edat por partisipá den grupo, representando nan skol òf organisashon, pa gana premio. 
Kòrsou su Plan Nashonal di Desaroyo (2015 – 2030) konosé 5 punto di lansa: edukashon, ekonomia, durabilidat (ku enfoke riba medioambiente), identidat nashonal i bon gobernashon. A finalisá e plan aki na komienso di 2016 i e promé parti di e plan ku a drenta implementashon ta e pilá ekonómiko, bou dikordinashon di MEO. Ta esensial pa prosesonan di implementashon bai kompañá pa komunikashon i p’esei MEO ta lansa e trayekto di komunikashon, pa medio di un kampaña pa hóben, den kolaborashon ku e demas Ministerionan ku ta responsabel pa un di e pilánan den e plan. Konsiderando ku na aña 2030, ora e Plan ta implementá, nos hóbennan di awe lo ta sin mas un grupo ku lo benefisiá di e Plan su implementashon, e kampaña aki ta dirigí riba nan. Den kuadro di e kampaña, e kategoria di edat di 15 – 18 aña lo mester traha riba nan propio interpretashon di un di e pilánan di e plan, pa medio di arte. Nan por ekspresá nan mes pa medio di un pintura, un skèch, un rèp, un poesia òf kualke otro ekspreshon di arte, segun nan eskoho.
Meta di e kampaña aki ta pa laga e trayekto largu di konsientisashon tokante e Plan kuminsá di un forma kreativo i interaktivo, lagando hóbennan krea kontenido tokante nan interpretashon di implementashon di e plan. P’esei mes título di e kampaña ta: “Kon nos ta benefisiá?”. E kampaña tin un durashon di aproksimadamente 3 siman. E hóbennan por entregá nan obra di arte pa mas tardá djaluna 29 di yanüari 12:00 PM. E skol
òf organisashon ku e hóbennan ta representá mester inskribí pa por partisipá i partisipashon ta grátis. E kriterionan di análisis ta kreatividat, kontenido di e Plan Nashonal, abilidat pa visualisá, motivashon pa partisipashon i kantidat di “like” riba e página di Facebook di Kòrsou Kapasitá. Pa mas informashon tokante e kampaña por bishitá e “web page” spesialmente trahá pa e kampaña: www.kitinaden.com. Tambe por bishitá e página di Facebook di Kòrsou Kapasitá, e-mail MEO na [email protected] òf yama señora Gilian Martina, kordinadó di e
kampaña na 516 30 12.
