Desde ayeranochi ta reinando un tension halto na Warda nos Costa y na Migracion. Ambos departamento ta bou presion enorme di Minister mr. Andin Bikker relaciona cu su maneho di admision y expulsion. Ta acusa e mandatario y su conseheronan di metemento constante den nan trabou diario, lagando stranheronan indocumenta sali liber of duna nan entrada via Migracion na Aeropuerto y waf.
Despues di e susedido di ayeratardi lat, e trahadonan di Warda nos Costa ta sinti cu ta basta. Nan a yama nan sindicato y ta evalua pa bay den accion. Nan a tende cu Trudy Hassell lo ta evaluando pa bandona e posicion y regresa como Comisario di Polis, loke por ocasiona welga na WNC.
Pero si Trudy Hassell bandona su puesto, e chens ta grandi cu Icho Matos di Migracion tampoco lo keda. Ambos ta bou presion constante y e trahadonan ta bisa awo cu nunca nan a sinti tanto metemento di ariba den nan departamentonan. Na Migracion tin 3 sindicato y tur ta pendiente movecion di Minister Andin Bikker pa nan bay den accion mesora.
Un di e casonan cu mas di un fuente a divulga na nos ta relaciona cu un “inval” di Warda nos Costa na un restaurant masha popular na Noord. Ey a haya 7 trahado indocumenta trahando. A resulta cu despues a bin ordo di ariba pa laga e ilegalnan bay. Y ora cu a traha multa, e multanan nunca a yega. E top di Warda nos Costa ta sinti cu nan ta luchando pa combati ilegalidad pero Gobierno mes ta “dwijlen met de kraan open”. E trahadonan awo no kier procesa rapport mes mas pasobra no sa cua lo bay pa multa of cua lo drenta e famoso “lachi”.
Warda nos Costa a informa awe cu ya Trudy Hassell a informa Minister Andin Bikker di e tension y el a bisa dialuna merdia e ta papia cu e trahadonan eynan mes. Parce cu awe el a yama riba un otro tono, mas normal y sin presiona. Probablemente el a sinti e “heat” di e trahadonan y sindicato den su direccion, relaciona cu su maneho di “scogencia” na unda mag controla pa ilegalnan y unda bo mag!
