Desde dialuna di e Siman Santo aki, e ekipo di Taskforce Beach Policy a ranca sali cu nan accionnan, bou direccion di Cuerpo Policial y Directie Infrastractuur en Planning (DIP). Nan a logra parti un cantidad di Procesverbaal na tur cu no ta cumpliendo cu e leynan vigente, specialmente watersportsnan y esunan cu ta huur parasol of stoel canto di laman dilanti nos hotelnan Highrise.
Alto Inspector di Polis, Gino Winklaar, ta encabesa e ekipo aki, cu separa di Polis y DIP, ta conta tambe cu otro departamentonan pa sosten y colaboracion, cu ta Directie Openbare Werken (DOW), Departamento di Impuesto (DIMP), Ministerio di Infrastructura, Directie Scheepvaart y Kustwacht. Mester menciona cu e cooperacion entre Polis, DIP y DOW ta escencial.
Hecho ta cu maneho di tereno y e permisonan relaciona cu operacion di watersports of pa huur parasol y stoel di lama ta un prerogativo di DIP, pero como cu ta Polis ta haya nan cu e problemanan diariamente, a opta pa haci uzo di un Taskforce pa hunto pone ordo riba beach. Esaki ta un problema di hopi aña caba, pero Gobiernonan a bin y bay sin nunca a logra soluciona e desordo cu Ministernan mes a causa dor di otorga permisonan tras di otro sin tene cuenta cu e inconveniencia cu esaki ta causa pa e trafico normal di hende dilanti e hotelnan.
Di otro banda, e companianan chikito, cu ta considera nan mes e “victima” nan, ta kehando cu autoridadnan ta haciendo tur esaki pa complace e hotelnan grandi y comerciantenan yega na e Gobierno nobo y e Minister nobo di infrastructura, esta Otmar Oduber. Es mas, nan ta purbando pa haya un reunion cu e mandatario pa splica nan posicion, pero sin resultado. No por descarta cu na caminda, e asunto aki por traduci den batayanan legal den Corte.
For di e Taskforce a compronde cu a scucha tur partido envolvi desde un principio caba. Hasta cu Minister a sinta pa asina splica e retonan cu tin y dicon mester aplica ley pa bin regulacion.
E Taskforce Beach Policy ta consciente di esaki y ta conta cu Huristanan di DIP, DWJZ y di Ministerio di Infrastructura, cu ta cla pa defende Gobierno si acaso esunnan cu ta viola ley scoge pa e caminda legal.
Mester menciona cu henter e polemica aki a lanta for di 15 di januari ultimo, ora cu e directornan di Delphi Watersport y Ocean Faith Watersport a arma un escena masha mahos riba beach, cu a subi internet y a bay “viral”. Nan mes a pone cu tur wowo a bay riba e situacion for di control riba beach.
Awe Bierna Santo e ekipo a sali atrobe pa tene control y atrobe a bay cu un cantidad di stoel y otro artefacto ilegal instala riba beach. E ekipo e ultimo dianan aki ta conta tambe cu participacion di varios Polisnan studiante na Academia Policial Watty Vos, cu ta uza e proyecto aki pa haya punto.
Ta bon pa subraya si, cu mester haci algo riba beach pasobra sea Gobierno tin rason of e companianan di watersport, pero cu tin un DESORDO awor aki ta un hecho!
