Hulanda no lo ofrece asistencia activo den caso di un gran fluho migratorio for di Venezuela pa entre otro Corsou. Esey ta loke e minister di Asuntonan Exterior, Stef Blok a bisa durante su bishita na e isla. Sinembargo, lo bay tin asistencia tecnico den forma di placa y asistencia di servicio di Imigracion y Naturalisacion, segun NL-Nieuws.

Blok ta considera cu e politica di refugiadonan di Corsou, Sint Maarten y Aruba, ta responsabilidad di e propio islanan. Si surgi problema di e fluho migratorio for di Venezuela, ta coresponde na ACNUR, e organisacion di Nacionnan Uni pa refugiadonan, haya un solucion.

Venezuela ta sufriendo un crisis economico profundo. Hopi hende ta purba di huy for di e pais y purba di crusa pa Corsou por ehempel. Segun Blok, no por yama e migrantenan pa refugiado na e momentonan aki.

 

Identifica refugiado

Sinembargo, mas migrante ta ingresando den e pais, unda cu refugiadonan por ta involucra. E empleadonan di IND Hulandes (Immigratie- en Naturalisatiedienst) lo bay yuda identifica e Venezolanonan desplasa, segun e minister. Hulanda tambe lo haci un donacion di 100 mil Euro pa aumenta e capacidad di e centronan di detencion riba e isla.

Minister Blok a ricibi un peticion di ciudadanonan preocupa y Venezolanonan. Segun nan, e opvang na Corsou ta asina streng cu ya e no ta humano.