Despues cu a bira conoci cu e compania estatal Serlimar y EcoGas a yega na un acuerdo comercial pa hunto procesa desperdicio den un forma mas duradero, awe mainta e dos companianan a uni den un solo presentacion na medionan di comunicacion. A elabora riba e acuerdo di 6 luna cu nan a cera y a haci demostracion di con desperdicio ta yega eynan, ta procesa nan, separa sushi y despues pakete den saconan special conoci como “Envirobale” cu ta dera den un buraco grandi na Sero di Tijshi, situa eytras mes.
Twyma van der Biezen, kende ta gerente di mercadeo y benta na Serlimar a conta nos cu nan tin un acuerdo pa un periodo di 6 luna cu EcoGas. E acuerdo ta encera cu ta deposita desperdicio residencial y comercial solido na EcoGas, pa nan procesa a base di tecnologia di “Envirobale” deposita na Sero di Tijshi. Actualmente Serlimar a calcula cu nan ta entrega 2.546 ton di sushi colecta dor di Serlimar mes y entrega na EcoGas.
E vocero di Serlimar a conta awe mainta cu pa loke ta e aspectonan financiero, cu e acuerdo ta encera e tarifanan pa entrega di cada ton. Mesun cos cu tabata cobra na dump di Parkietenbos, awor ta cobra na EcoGas mientras cu ta comparti e gastonan entre ambos compania. Pa loke ta e maneho di Sero Tijshi ta cu EcoGas ta maneha e procedura di procesa e envoribale nan mientras cu Serlimar mes ta maneha e luga y ta dera e envirobale nan eynan. Serlimar mes ta coba e area, di un total di 150.000m2 di cual awor a uza solamente 6.900m2.
Ramsey Halabi, gerente general di EcoGas a conta cu awe mainta a haci un presentacion di e planta, a cana eyden, haci demostracion di e trabounan tumando luga y con specificamente ta procesando e sushi comercial di nan y residencial di Serlimar. EcoGas ta procesando riba 5 mil ton di sushi pa luna eyden. Ecotech ta riba 3 mil ton y Serlimar un tiki riba 2 mil ton pa luna di sushi. EcoGas ta dispuesto pa sigui ofrece e servicio aki, hasta si Gobierno no keda cla den e 6 lunanan di e contract actual.
Pa loke ta Parkietenbos, Twyma van der Biezen a conta cu e proceso di remediacion a inicia. Esey ta nifica cu menos desperdicio ta bayendo eynan y pronto ningun sushi mas lo bay Parkietenbos. E intencion ta pa elimina e sero di 50 meter cu tin riba dump, dor di por ehempel “energy recovery”. E ta un proceso cu lo tuma su tempo si. Pa loke ta desperdicio toxico, peligroso y medicinal, ta uzando un area specifico riba dump na Parkietenbos, pero e plan ta pa uza un “incinerator”.
Na final Twyma van der Biezen a haci un apelacion riba comunidad pa duna un man den e proceso di cambio aki. Nos a maneha desperdicio na Aruba di e mesun forma desde aña 1960, pero cu nos a yega na un situacion awor cu no por continua mesun cos mas y cu mester enfoca riba un maneho mucho mas duradero, eficiente y sin efecto riba salud di publico.
