Tanto Conseho di Minister di Reino como CAFT a duna aprobacion pa presupuesto 2018 di pais Aruba, a base cu lo mester bay corta 12 miyon e aña aki ainda den gasto di personal. Ademas mester bin un cuadro financiero nobo y Gobierno mester yega na palabracionnan nobo cu Hulanda, segun declaracion di miembro di fraccion di AVP, mr. drs. Richard Arends.
Gobierno tin algun fecha crucial su dilanti: juli pa entrega cuentanan anual 2017, augustus pa bin duna cuenta riba realisacion di presupuesto 2018, 1 september pa entrega presupuesto 2019 y prome cu 31 di december di e aña, gobierno tin cu entrega un cambio den e presupuesto di 2018 caminda ta incorpora palabracionnan di CAFT y Conseho di Minister di Reino. The clock is ticking y tempo ta cabando riba Gobierno pa cumpli cu loke tin palabra pa e fechanan aki.
Segun splicacion di Prome Minister pa aña 2019 lo bay conta c’un deficit di 0.5% ekivalente na 25 miyon di florin, na aña 2020 mester tin un surplus di 0.5% ekivalente na 25 miyon florin y pa aña 2021 en adelante, un surplus di 1% cu ta ekivalente na 50 miyon florin.
“Den un luna y mei di tempo gobierno mester trece padilanti lo ta bay reduci 130 miyon florin na 2019 compara cu aña 2018. Mester bisa cu e suma aki ta igual na e suma cu a aumenta prespuesto 2017 cune tambe igual na e gastonan excesivo di aña 2018, si compare cu realisacion di aña 2017 cu a wordo financia pa e aumento di BBO y BAZV.
E cifranan aki refleha tambe e preocupacionnan cu fraccion di AVP a trece dilanti durante e ultimo lunanan y CAFT a confirma esaki: gobierno mester reduci su gastonan cu 130 miyon florin ya cu e gastonan ta excesivo, entre otro e gasto di personal.”
Segun un mocion cu a wordo aproba unanimamento den Parlamento, na augustus caba, gobierno tin cu bin duna cuenta tambe na con realisacion di presupuesto 2018 ta bayendo y splica cual entradanan a wordo logra y cual no, como tambe e gastonan y si a logra revoca e aumento den gastonan di personal.
Gobierno a presenta 7 punto den e reunion di Parlamento, cual ta e plan di reduccion di gastonan di personal cu lo genera 12 miyon na aña 2018 caba. E plan aki ta consistidi mantene un vacature stop; lo no renoba contractnan cu ta finalisa; lo elimina e aumento automatico di periodiek; lo reduci overtime; lo stimula salida boluntario di empleadonan publico entre otro cu VUT y lo elimina yenamento di vacaturanan cu ta wordo crea ora c’un persona bay cu pensioen; lo caba di ehecuta retironan a base di medidanan disciplinario; lo reactiva personal di overtolligheidsoel. “Esaki ta e mesun maneho cu nos a bin ta hiba durante e ultimo añanan y a logra reduci e cantidad di personal gradualmente den aparato central di Gobierno.
E 7 puntonan aki no ta suficiente pa logra reduci e gasto di personal cu 12 miyon florin cu ta comparable cu salario di 300 persona den servicio di gobierno den mita aña,” Sr. Arends a splica a base di su experiencia.
“Mirando e tiki tempo cu ta keda, nos no por bisa otro cu “the clock is ticking” pa nos haya mas claridad kico lo sosode si no yega na e reduccion manera palabra cu Hulanda. Nos ta spera tambe cu coleganan cu ta sostene coalicion, mara nan mes na mocionnan cu nan mes a trece dilanti y cu a wordo aproba tambe. Un cos nos ta sigur di dje aworaki esta cu CAFT lo keda pa e termino di e gobernacion aki cu ta te aña 2021 y esaki na mes momento ta mustra cu no tabatin confiansa den e plan financiero, no tabatin confiansa den e plan economico y esaki a pone cu a duna un extension di permanencia di e comision di supervision,” Parlamentario Richard Arends a declara.
