Diaranson dia 21 di Maart 2018 Hospital a ricibi un yamada cu na caminda famia tabata yegando cu un baby cu a caba di nace den auto. Gabriela y Rene Angelo Hoek tabata na caminda pa hospital na momento cu awa di yiu a kibra y e baby a nace di biaha, cual a pone cu casa Rene a cay den shock. Personal di hospital di biaha a mobilisa nan mes pa asina atende Gabriela y baby Abigail Hoek den parkeo di Departamento di Emergencia.
E experencia di a haya su di dos yiu tabata uno hopi lihe pa mama Gabriela, unda cu el a duna di conoce cu hopi hende muhe ta haya dolor y despues di basta ora nan ta drenta hospital. Den caso di mama Gabriela esaki no tabata e caso y e no a logra yega hospital na ora pa motibo cu e mucha a nace asina cu e awa di yiu a kibra. Manera e parto anterior, mama Gabriela a haya su di dos yiu sin presencia di partera. E nursenan a trata su persona hopi bon y e ta gradicido, asina el a duna di conoce.
Tata di e baby, Rene Angelo Hoek, a duna di conoce cu e tabata na trabou na momento cu Gabriela a yam’e bisando cu e tin dolor. Momento cu el a yega cas su pareha tabata malo y nan a bay hospital, unda cu na e rotonde pariba di hospital e awa di yiu a kibra y e baby a nace. Tata Rene a bay den un shock na momento cu e tabata stuur e auto. Na yegada e personal di Departamento di Emergencia di biaha a atende nan, mientras cu nursenan di Maternidad tabata bahando rapidamente. E atencion duna na nan tabata uno tremendo, unda cu tur hende a sali yuda di biaha. Tata y mama di baby Abigail ta gradici e personal di Hospital pa e tremendo servicio duna.
https://www.facebook.com/24ora.aruba/videos/10160557153605001/
Pa ziekenverzorgende Jacqueline la Rosa di Maternidad esaki ta prome biaha cu e ta experencia cu un mama ta haya su baby den auto. Nurse Rachelle Wathey di Materidad a duna di conoce cu pa su persona esaki tambe tabata prome biaha cu el a topa cu un situacion asina aki. Tin casonan cu e pashent no por a yega hospital na tempo y a haya yiu den auto. E experiencia aki tabata completamente diferente compara cu ora ta riba piso, asina Rachelle Wathey a duna di conoce.
Na momento cu nan a ricibi e yamada cu un pashent a haya yiu den auto, di biaha nan a coy tur material necesario y rapidamente a core bay Departamento di Emergencia pa atende cu e pashent. Nan a topa cu e baby den brasa di e mama y di biaha nan a cuminsa cu e proceduranan necesario, unda a check mama y baby pa sigura cu ambos tabata den bon condicion. Hospital a tuma contacto cu partera pa asina informa cu e pashent tabata eynan pa asina e por a bin controla nan.
Nurse Rachelle a gradici coleganan Judeli, Sheila y Mariela kendenan tabata presente na momento cu e caso a pasa. Tambe na e nursenan di Departamento di Emergencia, kendenan di biaha a atende cu e pashent asina cu el a yega hospital.
