Resientemente Selikor a inisiá ku trabounan di limpiesa na áreanan kaminda ta depositá shushi ilegal. E promé dos áreanan kaminda a kuminsá hasi limpiesa grandi ta Shut i Playa Canoa. Na e dos sitionan akí huntu ya a registrá un total di 827.000 kilo di shushi. Entretantu a finalisá e trabounan di limpiesa na e área di Shut i trabounan di limpiesa den área di Playa Canoa ta den nan fase final.
Na ámbos sitio a bin topa ku tur tipo di shushi. Sinembargo gran parti di e shushinan akí ta potoshi i tambe shushi di konstrukshon. Esaki sigur ta di lamentá ya ku pa loke ta trata potoshi un biaha pa luna Selikor ta rekohé e tipo di shushi akí grátis den tur bario na Kòrsou. Pa loke ta trata shushi di konstrukshon limpi esaki por wòrdu entregá kompletamente grátis na e fasilidat di resiklahe na Landfill Malpais.
Lamentablemente mester informá tambe ku ya kaba algun persona iresponsabel, ku no ta respetá lei ni regla, a bolbe kuminsá basha shushi na e sitionan ku resien Selikor a limpia. Outoridatnan konserní ta na altura i tin atenshon pa esaki i lo bai aktua ku man duru riba esnan ku ta hasi nan mes kulpabel na e akto ilegal di depositá shushi na sitionan ku no ta destiná pa esaki.
Selikor no ta kansa di ripití i enfatisá ku habitantenan por hasi uso di e diferente posibilidatnan (grátis) ku e kompania ta ofresé pa deshasí di shushi. No tin nesesidat pa tira shushi na sitionan ku no ta destiná pa esaki i kore rísiko di risibí un multa. Si di bèrdat nos ke realisá un Kòrsou mas limpi, nos mester kuminsá na nos mes dor di tene nos mes na lei i reglanan vigente ora nos ta atendé ku nos shushi, pasó t’asina ta hende.
