Despues di un lucha largo cu su salud, e conocido comerciante Ernesto “Netto” Arends a fayece awe diadomingo na Hospital. El a bay laga atras su tres yiu muhenan, Ludmila, Tir Zah y Lisandra y un cantidad di amigo y conocinan cu stim’e masha. E ta propietario di Kowloon Restaurant.
Kowloon Restaurant a habri na Juli 1975
Durante un entrevista na Juli di aña 2015, el a conta cu “E berdad ta cu mi idea inicial tabata pa cuminsa un Deli Shop, pero na caminda a cambia di idea”, asina Ernesto “Netto” Arends ta corda inicio di su plannan pa bay den negoshi di restaurant, mientras cu e mes tabata trahando na DOW e tempo ey. E kier a purba algo otro y e mesun negoshi ey a celebra 40 aña na 2015, cu a gosa di bon temponan y a sa di surpasa tur mal tempo tambe. “Nos ta Arubiano, unda nos ta bay? Ta aki nos ta keda lucha, cu si cos ta bon of menos bon”.
Hopi aña di sacrificio y dedicacion
“Mi ta orguyoso di ta e unico Arubiano cu a sa di hiba un restaurant pa 40 aña, sigui pa Sra. Alicia Botta di El Gaucho pa 38 aña. Es mas, nos ta considera cu nos ta un empresa cu 30 empleado cu ta papia nos idioma papiamento, cu tambe ta sirbi como un aporte pa comunidad”.
Cu nos amigo Netto sosega na paz.
