Minister Benny Sevinger: Watty Vos Boulevard ta e ‘backbone’ di infrastructura di Aruba

0
6

Proyectonan manera Green Corridor y Watty Vos Boulevard a wordo crea cu dos meta, pa mehora e producto Aruba en general y pa crea trabou pa nos hendenan cu alabes lo trece cune un desaroyo economico. Esaki ta loke cu Minister di Infrastructura Benny Sevinger a trece dilanti den conferencia di prensa dialuna mainta.

Wendys
Banco di Caribe
WEB

Watty Vos Boulevard (WVB) ta hopi importante pa pais Aruba y pa creacion di cupo di trabou.  “E ta bay ta e backbone entre San Nicolas, Oranjestad y sector hotelero. WVB no ta simplemente un caminda pa transporta auto, e ta mucho mas cu esey. Awor tin un congestion dilanti BSK unda cu tur e autonan cu ta bay direccion di hotel mester pasa, prueba cu e proyecto di WVB no mester a bini awe pero 30 aña pasa caba,” Sevinger a bisa. El a splica cu e caminda ta conoci como Ringweg 3, y ta sali for di aeropuerto, bay pa Meiveld, pasa den Sero Patrishi, Bushiri y yega na e conexion di Sasaki pa bay direccion di hotelnan.

Si mira e descripcion duna, no por bisa otro cu esaki ta e proyecto di mas grandi cu Aruba a conoce. E ta encera, e mandatario a splica, renobacion di diferente caretera, entre otro Sasaki cu lo wordo renoba completamente te cu Superfood bay abou te na Blvd bieu. E boulevard bieu ta wordo transforma den Linear Park fasenan 4, 5 y 6. Esaki ta conecta riba esunnan cu ta cuminsa for di aeropuerto, pasa haf bieu y yega Bushiri y despues di e conexion, Linear Park ta bay yega te na RIU.

E WVB tambe ta conecta Oranjestad cu Noord, cu ta nifica cu full e caya di santana di Playa te na MFA Noord ta bay wordo renoba y ambos banda di caminda tin espacio pa cana, pa core bicicleta, matanan ta wordo planta y espacio pa staciona. Un parti importante di dje ta e conexion di fiestpadnan cu lo cuminsa for di San Nicolas y ta yega te na El Faro na final.

Na ambos banda di caminda, terenonan di Gobierno cu lo bay bira disponibel lo wordo desaroya den forma comercial y pa vivienda. “E no ta djis un proyecto unda cu un caminda ta bay wordo construi, pero ta bay ta un caminda cu ta nifica e ‘backbone’ di infrastructura di nos pais cu mester a bini hopi tempo pasa, lo trece siguridad, desaroyo economico, trabou y mehoracion calidad di bida pa tur ciudadano di Aruba.”

Riba Watty Vos Boulevard ta wordo construi na diferente punto rotondenan nobo, en total 10, y algun Fly-over (camindanan cu ta pasa over di otro), conexion entre WVB y e barionan existente. Un plan di mobilisacion total pa descongestiona e trafico riba Boulevard. “Esaki ta e meta di WVB cu a bay den destaho publico den cual a participa diferente consorcio y a wordo gana pa Moto-Engil,” e mandatario a bisa.

 

Comments

comments